हिमाल प्रेस 
काठमाडौँ– वन कुकुर (ढोंले) विश्वभर पाइने क्यानिड्स परिवारको लोपोन्मुख स्तनधारी प्रजाति हो। पारिस्थितिकीय प्रणाली र जैविक विविधता सन्तुलनमा महत्त्वपूर्ण भूमिका खेल्ने वन कुकुर पछिल्लो समयमा लोप हुने अवस्थामा पुगेको छ।
लोप हुने अवस्था पुगेपछि पछिल्लो समय यसको खोजी, अनुसन्धान हुनुका साथै यसको संरक्षणका लागि विश्वका केही मुलुकबाट वैज्ञानिक, अभियन्ता र विज्ञहरू लागि परिरहेका छन्।
यसै सन्दर्भमा क्यानडिड स्पेसलिस्ट ग्रूपअन्तर्गतको ढोल वर्किङ ग्रूपको आयोजनामा हालै नेपालमा सप्ताहव्यापी दोस्रो अन्तर्राष्ट्रिय वन कुकुरसम्मेलन नेपालमा सम्पन्न भएको छ। यस अघि यस्तो पहिलोसम्मेलन सन् २०१९ मा थाइल्यान्ड मा भएको थियो।
यही जेठ १८ देखि २४ गतेसम्म चितवनको सौराहामा भएकोसम्मेलनमा वन कुकुर संरक्षणका काम गरिरहेका विभिन्न १३ देशका ४० जना वन कुकुर संरक्षणकर्मीको सहभागिता रहेको थियो।सम्मेलनले वन कुकुर संरक्षण कार्ययोजना बनाई कार्यान्वयनमा लैजाने निष्कर्ष निकालेको छ।
सम्मेलनमा वन कुकुरको अवस्था, संख्या वितरण, आहारको उपस्थिति तथा संरक्षणका लागि गर्नुपर्ने कार्ययोजनाका बारेमा छलफल भएको ग्रूपका नेपाल संयोजक डा. अम्बिका खतिवडाले जानकारी दिए। यसले सरकारलाई नीतिगत सहयोग पुग्ने उनको विश्वास छ।
सन् २०१५ को तथ्यांकअनुसार विश्वभर २ हजार पाँच सयको हाराहारीमा वन कुकुर रहेको अनुमान छ। नेपालमा यो वन्यजन्तु यति नै संख्यामा छन् भन्ने यकिन नभए पनि सयदेखि २ सयको हाराहारीमा रहेको अनुमान गरिएको छ। वन कुकुर नेपालसहित भारत, चीन, बंलादेश, भुटान, कम्बोडिया, इन्डोनसिया, मलेसिया, म्यानमार, थाइल्यान्ड र लाओस् गरी ११ वटा देशमा पाइएको बताइन्छ।
नेपालको तराईमा चितवन, पर्सा, बर्दिया तथा शुक्लाफाँटा राष्ट्रिय निकुञ्जमा पाइन्छ भने उच्च भूभागमा कञ्चनजंघा संरक्षण क्षेत्र, रारा राष्ट्रिय निकुञ्ज, खप्तड राष्ट्रिय निकुञ्ज तथा ढोरपाटन सिकार आरक्ष क्षेत्र एवम् हुम्लाको लिमी भ्यालीमा पाइएको यस वन्यजन्तुका विषयमा विद्यावारिधी गरेका डा. खतिवडाको भनाइ छ।
यी जनवार चुरे क्षेत्रमा बढी देखिएका छन्। वन कुकुर अन्तर्राष्ट्रिय प्रकृति संरक्षण संघको र नेपालको लोपोन्मुख संरक्षण स्थितिमा सूचीकृत छ। शारीरिक संरचना र आनीबानीको रूपमा कुकुर र ब्वाँसो छुट्टिइसकेकाले वन कुकुर ब्वाँसो होइनन् र ब्वाँसो वन कुकुर होइनन्।
वन क्षेत्रको विनाशले वासस्थान अतिक्रमण, आहाराजन्य प्रजातिको कमी एवम् विष तथा पासो थापेर मार्ने प्रवृत्तिको वृद्धिलगायतका कारणले यो प्राणी लोप हुने अवस्थामा पुगेको उनको भनाइ छ।
राष्ट्रिय प्रकृति संरक्षण कोष सौराहाका प्रमुख रचना शाहकाअनुसार सिकारी प्रजातिको वन कुकुरको संरक्षणमार्फत यसका आहारजन्य प्रजातिको नियमनमा सघाउ पुग्ने भएकाले पनि यसको संरक्षण आवश्यक छ। यसबिना आहाराजन्य प्रजातिको वृद्धि अनियन्त्रित भई वन्यजीव-मानव द्वन्द्व अझ बढ्न सक्ने बताइन्छ।
वन कुकुर उभिँदा १७-१२ इञ्च र लम्बाइमा ३ फिटसम्मका हुने गर्दछन्। सामान्यतया पानीको स्रोत आसपास रहेका साधारण गुफा, जटिल गुफा, चट्टानको मुनि यिनीहरूको बसोबास देखिन्छ।
औसत पाँचदेखि १० संख्याको समूहमा रहने यी वन कुकुर भने अन्य कुकुर प्रजाति (अफ्रिकी जंगली कुकुरसहित)भन्दा शान्त स्वभावका हुन्छन्। यिनीहरू एकान्तप्रेमी हुने हुँदा मानिसको वरपर निकै कम देखिने गर्दछन्।
वन कुकुरमा स्नातकोत्तरको शोधकर्ता तुष्णा रायमाझी हालसम्म यस क्षेत्रमा भएका अध्ययनले यसको संख्या निर्धारण र बासस्थान क्षयीकरण बारेमा पर्याप्त जानकारी हासिल गर्न नसकेको बताउँछन्। यसको संरक्षण गरेर पर्यटनसँग पनि जोड्न सकिने उनको धारणा छ।
यसको संरक्षणका लागि संरक्षण कार्ययोजना आवश्यक रहेको जोड दिँदै वन कुकुर देखिएका स्थानमा सम्बन्धित स्थानीय तहसँग मिलेर जनचेतनामूलक कार्यक्रमलाई अघि बढाउनुपर्ने अध्ययनकर्ता अस्मिता पाण्डेको भनाइ छ।
वन कुकुर अधिकांश सिकार पानीको स्रोत आसपास नै गर्ने गर्दछन्। यसको सिकारमा मुसा प्रजातिदेखि जरायो, चित्तल, जंगली बदेल, रतुवा, गौरी गाईलगायतसम्म पर्छन्। हिमाली भेगमा पाइने वन कुकुरले भने चरनमा लगिएका भैंसी, गाई, भेडा, बाख्रा, आदिको सिकार गर्ने गरेको देखिन्छ। वन कुकुरले धेरैजसो पाका र रोगले कमजोर भएका वन्यजन्तुको सिकार गर्छ।
स्वास्थ्य पोथी वन कुकुरले बढीमा १२ वटासम्म बच्च जन्माएको पाइएको छ। यसको गर्भावस्थाको अवधि करिब २ महिना हुन्छ। -रासस
