स्रोत साधन अभावमै विद्यार्थी पढाइरहेको दमौलीको बहिरा आवासीय विद्यालय

दमौली– कक्षाकोठामा विद्यार्थी कोही पढिरहेका छन्, कोही लेखिरहेका छन्। कोही विद्यार्थी भने इसारामा केही भनिरहेका छन्। यो दृश्य तनहुँको व्यास नगरपालिका-१ खकौलीमा सञ्चालित बुद्ध दाहाल बहिरा आवासीय प्राथमिक विद्यालयको हो। सदरमुकाम दमौलीबाट २ किलोमिटर दूरीमा रहेको उक्त विद्यालयमा सुस्त श्रवण भएको व्यक्ति अध्ययन गर्छन्।

तनहुँ, लमजुङ, गोरखा, स्याङ्जा, नवलपरासीका ती विद्यार्थी उक्त विद्यालयमा आवासीयरूपमा बसेर अध्ययन गर्दै आएका छन्। ती विद्यार्थीलाई बस्ने, खाने व्यवस्था सरकारले गर्दै आएको छ। तर पनि विद्यालयलाई आर्थिक समस्या पर्दै आएको छ।

०६५ मा प्रतिविद्यार्थी ४ हजार दिने गरिएकामा हालसम्म पनि रकम वृद्धि नहुँदा समस्या हुँदै आएको विद्यालय व्यवस्थापन समितिका अध्यक्ष मणिजंग बस्नेत बताउँछन्।

‘१४ वर्ष पहिला जति रकम विद्यार्थीका लागि दिइन्थ्यो, अहिलेसम्म पनि सोही रकम हुँदा व्यवस्थापनमा समस्या हुँदै आएको छ,’ बस्नेतले भने, ‘तर जसोतसो व्यवस्थापन गर्नुको विकल्प पनि छैन।’

सरकारले सुस्त श्रवण भएको व्यक्तिका लागि मासिक प्रतिविद्यार्थी ४ हजार रूपैयाँका दरले रकम उपलब्ध गराउने गरेको छ। उक्त रकमबाट विद्यार्थीका लागि खाना, पोशाक, सरसफाइ, टेलिभिजन, इन्टरनेट, बिजुली, पानीको व्यवस्थापन गर्नुपर्ने बाध्यता रहेको छ।

‘१४ वर्षसम्म एउटै रकम हुँदा अप्ठ्यारो छ, सरसामानको मूल्यवृद्धि छ,’ बस्नेत भन्छन्, ‘हाल विद्यालयको मुख्य समस्या नै यहीँ हो। त्यति न्यून रकममा विद्यार्थी व्यवस्थापन गर्नुपरेको छ।’

यस विषयमा सरोकारवाला निकायमा पटक-पटक ध्यानाकर्षण गराउँदा सुनुवाइ नभएको बस्नेतको गुनासो छ। ‘राज्यले यो समस्या समाधानमा ध्यानै दिएन, धेरैपटक सरोकारवाला निकाय गुहारिसक्यौँ, कतैबाट सम्बोधन हुँदैन,’ बस्नेतले भने।

कक्षा १ देखि ५ सम्म सञ्चालित उक्त विद्यालयमा २८ विद्यार्थी छन्। यसमध्ये नौ छात्रा र १९ छात्र छन्। कक्षा १ मा ५ छात्रा र सात छात्र, कक्षा २ मा एक छात्रा र ४ छात्र, कक्षा ३ मा ४ छात्र, कक्षा ४ मा २ छात्रा र एक छात्र र कक्षा ५ मा एक छात्रा र ३ छात्र अध्ययनरत छन्। ती विद्यार्थी बस्नका लागि विद्यालय आडैमा आवासगृह भवन निर्माण गरिएको छ।

६ वर्षअगाडि पाहार ट्रष्ट नेपाल नामक संस्थाले आवासगृह भवन निर्माण गरिदिएको थियो। उक्त भवनमा ४० जनासम्म विद्यार्थी राख्न सकिने विद्यालयका प्रधानाध्यापक भैरव पन्थ बताउँछन्।

२८ जना विद्यार्थीका लागि १० महिनावापतको रकम विद्यालयमा आउँछ। सोही रकमबाट विद्यार्थीको सम्पूर्ण व्यवस्थापन गर्नुपर्ने बाध्यता छ। महिनामा २ पटक मासु र हप्तामा एकपटक अण्डाको व्यवस्था गरिएको छ। विद्यालयमा भौतिक सुविधा राम्रो रहे पनि विद्यार्थीको आर्थिक पाटोका कारण समस्या हुने गरेको प्रधानाध्यापक पन्थले बताए।

व्यास नगरपालिका-१ का वडा सदस्यसमेत रहनुभएका व्यवस्थापन समितिका अध्यक्ष बस्नेतले यस विषयमा स्थानीय सरकार व्यास नगरपालिकामा कुरा उठाउने गरे पनि सम्बोधन नभएको गुनासो गर्छन्। ‘म आफैँ स्थानीय सरकारको प्रतिनिधित्व हुँ, नगरप्रमुखसँग यस विषयमा धेरैपटक कुरा गरिसकेँ, सुनुवाइ हुँदैन,’ बस्नेतले भने, ‘भवन निर्माण, भान्साकोठा व्यवस्थापनका लागि पनि नगरपालिकाको तर्फबाट बजेट आउँछ।’

यही वर्ष व्यास नगरपालिकाको ३ लाख सहयोगमा भान्साकोठा निर्माण गरिएको छ।

कक्षा ५ उत्तीर्ण भएपछि यहाँका विद्यार्थी पोखरा, गोरखा, बागलुङ जाने गरेका छन्। गत शैक्षिकसत्रमा यहाँबाट ३ विद्यार्थी अन्यत्र गएका छन्। विद्यालयमा प्रधानाध्यापकसहित ५ शिक्षक छन्।

यसमध्ये २ पूर्ण तथा एक आंशिक सुस्त श्रवण भएको व्यक्ति र १ जना दोभाषे शिक्षक कार्यरत छन्। शिक्षकमध्ये एक स्थायी रहेको र बाँकी ४ जना करारमा रहेको विद्यालयले जनाएको छ।

यस्तै विद्यालयमा ४ सहयोगी कर्मचारी छन्। ती कर्मचारीको मासिक तलब पनि न्यून छ। मासिक रु १३ हजार ४ सय ५० तलबमा उनीहरूले काम गर्दै आएका छन्।

०५२ मा खरीस्वाँरा प्राथमिक विद्यालयका रूपमा सञ्चालित विद्यालयलाई ०५२ मा स्थानीय मिश्र परिवारले एक रोपनी जग्गा दिएपछि उक्त विद्यालय गंगादत्त प्राविमा रूपान्तरण भएको थियो।

सोही ठाउँका खड्गबहादुर दाहाल र सीता दाहालले माइला छोरा स्व बुद्धसागर दाहालको स्मृतिमा विद्यालय भवन निर्माणका लागि विसं २०५६ मा जग्गा दान दिएको थियो। स्व दाहाल भारतीय सेनामा रहँदा विसं २०५५ फागुन ११ गते जागिरकै सिलसिलामा मृत्यु भएको थियो। दाहाल परिवारले छोराको स्मृतिमा एक रोपनी ८ आना जग्गा र रु १० लाख सहयोग गरेका थियो।

त्यतिबेला बुद्ध दाहाल प्राथमिक विद्यालयको रूपमा सञ्चालित यस विद्यालयमा विद्यार्थी संख्या कम भएपछि ०७१ मा जलदेवी माध्यमिक विद्यालयमा गाभिएको थियो।

जलदेवी माध्यमिक विद्यालयमा ४वटा स्रोत केन्द्रमार्फत सुस्त श्रवण भएको व्यक्ति अध्ययन गर्दै आएका थिए। विसं २०७४ असारबाट भने बुद्ध दाहाल बहिरा प्राथमिक विद्यालयको रूपमा हालसम्म सञ्चालित छ। त्यतिबेला विद्यालयमा ३२ जना विद्यार्थी अध्ययनरत थिए। -राससको सहयोगमा