यामालको चर्चाबीच ओयारजाबाल बने स्पेनका नायक

विश्वकपमा स्पेनले खेलेका हरेक खेलअघि समर्थकहरूले लगाएका जर्सीको पछाडि सबैभन्दा धेरै देखिएको नाम हो- लामिन यामाल।

लस एन्जलस स्टेडियममा बिहीबार अस्ट्रियाविरुद्धको अन्तिम ३२ को खेलअघि पनि क्यामेराको केन्द्रमा यामाल नै थिए। खेलाडीहरू मैदानमा प्रवेश गर्दा पनि सबैको ध्यान उनीतर्फ नै थियो।

तर, यो स्पेन टोलीका सबैभन्दा चर्चित खेलाडी नभए पनि अहिलेसम्म सबैभन्दा प्रभावशाली प्रदर्शन गर्ने खेलाडी भने मिकेल ओयारजाबाल बनेका छन्।

२९ वर्षीय रियल सोसिडाडका फरवार्ड ओयारजाबालले दुई गोल गरेपछि साविक युरोपियन च्याम्पियन स्पेनले अस्ट्रियालाई ३-० ले सहज रूपमा पराजित गर्दै १६ वर्षपछि पहिलोपटक विश्वकपको नकआउट चरणमा जित हात पार्दै अन्तिम १६ मा स्थान सुरक्षित गर्यो।

स्पेनी फुटबल विशेषज्ञ गुइलेम बालागुएले बीबीसीसँग भने,‘लामिन यामाल टोलीका नेता हुन् भन्ने कुरा एकदम स्पष्ट छ। टोलीका सबै गतिविधि उनीसँग जोडिएका हुन्छन्। तर मिकेल ओयारजाबाल भने अदृश्य नायक हुन्। उनले खेलेका हरेक फाइनलमा गोल गरेका छन्। उनी हाम्रो टोलीका सबैभन्दा बुद्धिमान खेलाडीमध्ये एक हुन् र कुनै पनि बेला खेलको नतिजा बदल्न सक्ने क्षमता राख्छन्।’

‘पछिल्ला दुई सिजन उनको करिअरकै उत्कृष्ट’

१९ वर्षको उमेरमा अन्तर्राष्ट्रिय फुटबलमा डेब्यु गरेका ओयारजाबालले लामो समयसम्म धेरै चर्चा पाएनन्। सन् २०२२ को कतार विश्वकप भने उनले खेल्न पाएनन्। बायाँ घुँडाको एन्टेरियर क्रुसिएट लिगामेन्ट (एसीएल) चुँडिएपछि उनी टोलीबाट बाहिरिएका थिए।

तर चार वर्षपछि विश्वकपमा पहिलो पटक खेल्न आउँदा उनी जीवनकै उत्कृष्ट लयमा थिए। विश्वकपअघि उनले राष्ट्रिय टोलीका लागि १२ खेलमा १२ गोल गरेका थिए।

अस्ट्रियाविरुद्ध दुई गोल गरेसँगै पछिल्ला १६ खेलको सुरुवाती रोजाइमा उनले १७ गोल पुर्याएका छन्। यस विश्वकपमा मात्र उनले चार गोल गरिसकेका छन्।

बालागुएले भने, ‘चोटबाट फर्किएपछि बिताएका पछिल्ला दुई सिजन उनको करिअरकै उत्कृष्ट हुन्। विश्वकपमा चार गोल गरेका उनी अहिले स्पेनका सबैभन्दा निर्णायक खेलाडी हुन्।’

सन् २०१२ को युरोकप जित्दा स्पेनले धेरैजसो खेलमा प्राकृतिक स्ट्राइकरबिनै खेलेको थियो। तर अहिले ओयारजाबाल नै आक्रमणको मुख्य आधार बनेका छन्। अस्ट्रियाविरुद्ध उनले उत्कृष्ट दुई फिनिसिङ गर्दै त्यो प्रमाणित गरे।

स्पेनका पूर्वरक्षक सेसर अज्पिलिकुएटाले बीबीसी वनसँग भने,‘धेरैले स्पेनको सेन्टर–फरवार्डबारे प्रश्न उठाउँछन्, तर ओयारजाबालले आफ्नो जिम्मेवारी उत्कृष्ट रूपमा निभाइरहेका छन्। केही वर्षअघि उनी दायाँ विङमा बढी खेल्थे, अहिले भने उनी मध्यभागमा खेल्न थालेका छन्।’

सन् २०२५ को सुरुदेखि अन्तर्राष्ट्रिय फुटबलमा ओयारजाबालभन्दा धेरै गोल गर्ने युरोपेली खेलाडी केवल नर्वेका स्ट्राइकर एर्लिङ हालान्ड मात्र हुन्, जसले २२ गोल गरेका छन्।

ओयारजाबाल विश्वकपको नकआउट चरणमा दुई गोल गर्ने सन् १९८६ मा डेनमार्कविरुद्ध अन्तिम १६ को खेलमा एमिलियो बुट्रागुएनोपछि पहिलो स्पेनी खेलाडी पनि बनेका छन्।

यद्यपि यी उपलब्धिले उनी लामिन यामालको छायाँमा परेको देखाउँदैन। बरु १८ वर्षीय बार्सिलोनाका फरवार्ड यामालकै प्रभावका कारण ओयारजाबालले अझ बढी चम्कने अवसर पाइरहेका छन्।

यामालको उत्कृष्ट बल नियन्त्रण र ड्रिब्लिङका कारण विपक्षी रक्षकहरू उनीतर्फ तानिन्छन्। त्यसले ओयारजाबालका लागि खाली स्थान सिर्जना हुन्छ।

जर्मनीका पूर्वमिडफिल्डर थोमस हिट्सल्सपर्गरले भने,‘तिम्रो टोलीमा लामिन यामालजस्तो खेलाडी हुँदा विपक्षीको ध्यान उनीतर्फ जान्छ भन्ने थाहा हुन्छ। त्यसपछि ओयारजाबालले खाली स्थानको उपयोग गर्छन्, बल पाउँछन् र गोल गर्छन्।’

हक्कीबाट सिके ‘गोलको गन्ध’ पहिचान गर्न

ओयारजाबाल आधुनिक फुटबलका दुर्लभ खेलाडीमध्ये एक हुन्, जसले आफ्नो सम्पूर्ण क्लब करिअर एउटै क्लब रियल सोसिडाडमा बिताएका छन्। गत सिजन उनले ला लिगामा व्यक्तिगत रूपमा सर्वाधिक १५ गोल गरे जुन राष्ट्रिय टोलीमा देखिएको उत्कृष्ट प्रदर्शनसँग मेल खान्छ।

हालै उनले गोल गर्ने आफ्नो भोक बाल्यकालमा खेलेको अर्को खेलबाट आएको बताएका थिए। उनले भने,
‘म पहिले हक्की खेल्थेँ र धेरै गोल गर्थेँ। मेरो मनमा सधैँ एउटा आवाज आउँथ्यो- ‘एउटा अवसर गुमायौ भने पनि केही फरक पर्दैन, अर्को अवसर आउँछ। म गोलको गन्ध थाहा पाउँथेँ, त्यो आवाज सधैँ मेरो मनमा हुन्थ्यो।’

अहिले केन्द्रमा खेल्दा उनी अझ प्रभावकारी देखिएका छन्। उनले भने,‘अन्य स्थानका खेलाडीले राम्रो प्रदर्शन गर्न धेरै समय बलसँग बिताउनुपर्छ। तर स्ट्राइकरका लागि केही क्षण मात्रै निर्णायक हुन्छन्। हामीले बल कहाँ खस्न सक्छ वा गोल गर्ने अवसरका लागि कहाँ उभिनुपर्छ भन्ने गन्ध पत्ता लगाउन सक्नुपर्छ।’

‘स्पेनसँग अझै धेरै स्तर बाँकी छ’

यस विश्वकपमा चार खेलमा चार गोल गरिसकेका ओयारजाबाल मात्र स्पेनको सफलताको कारण होइनन्। युरो २०२४ को उपाधिपछि विश्वकप जित्ने दाबेदारका रूपमा पनि स्पेनलाई हेरिएको छ।

अस्ट्रियामाथिको जितसँगै स्पेनको अपराजित यात्रा ३४ खेल पुगेको छ। यदि उनीहरू क्वार्टरफाइनल पुग्न सफल भए भने ३५ खेलको आफ्नै कीर्तिमान बराबरी गर्नेछन्।

प्रतियोगिताको सुरुवात भने स्पेनका लागि अपेक्षाकृत कमजोर रह्यो। डेब्यु टोली केप भर्डेसँग गोलरहित बराबरी खेलेको टोली त्यसपछि निरन्तर सुधारिएको छ।

चार खेलमा आठ गोल गरिसकेको स्पेनले अहिलेसम्म कुनै गोल खाएको छैन। अब अन्तिम १६ मा उसको सामना पोर्चुगल वा क्रोएसियामध्ये एकसँग हुनेछ।

इङ्ग्ल्यान्डका पूर्वस्ट्राइकर डियोन डब्लिनले बीबीसीसँग भने,‘मलाई लाग्छ स्पेनसँग अझै धेरै स्तरमा खेल्ने क्षमता बाँकी छ। अस्ट्रियाविरुद्ध उनीहरूले तेस्रो वा चौथो गियरमा मात्रै खेल्दा पनि सहज जित निकाले, किनकि विपक्षीले खास चुनौती दिन सकेन। यही नै उनीहरूको विशेषता हो। फ्रान्स, पोर्चुगल वा अन्य बलिया टोलीसँग खेल्दा उनीहरूले आफ्नो स्तर अझ माथि उठाउनेछन्। उनीहरूसँग अझ धेरै देखाउन बाँकी छ र यही कुरा प्रतियोगिताका बाँकी टोलीहरूका लागि सबैभन्दा डर लाग्दो पक्ष हो।’