हिमाल प्रेस 
काठमाडौँ – कृषि तथा पशुपन्छी विकासमन्त्री रामनाथ अधिकारीले आफूले किसानका पक्षमा इमान्दरीताका साथ काम गर्ने प्रतिबद्धता बोकेको बताएका छन्। मुक्तिनाथ कृषि कम्पनीको छैटौं वार्षिक उत्सवको अवसरमा आयोजित कार्यक्रममा मन्त्री अधिकारीले गाउँमै फर्किएर कृषि कर्म गर्न अभिप्रेरित गर्ने कार्य गरेकोमा कम्पनीको प्रशंसासमेत गरे।
कृषि क्षेत्रमा वार्षिक बजेट बढाउन आवश्यक रहेको बताउँदै उनले कृषिको व्यवसायिकरणमा प्रविधि, पूर्वाधार, जनशक्ति तथा बजार प्रमुख भएकाले यस क्षेत्रमा व्यवस्थित र रणनितिक लगानीको जरूरी रहेको उल्लेख गरे।
सरकारले घोषणा गरेको कृषिमा लगानी दशकलाई सफल बनाउने दायित्व नीजि क्षेत्रको समेत भएको उल्लेख गर्दै मन्त्री अधिकारीले यसका लागि मन्त्रालयले गृहकार्य गरिरहेको बताए। उनले स्थानीय तहबाटनै उत्पादन क्षेत्रहरुको घोषणा गर्ने, कृषिको रुपान्तरणका लागि प्रमुख बाली पूर्वाधारको छनौट गर्ने, कृषिमा लगानी दशक कार्यक्रम कार्यान्वयन कार्ययोजना तयार गर्ने र सोको कार्यान्वयनको लागि सार्वजनिक सहकारी र नीजि लगानी केन्द्रित गर्नु अपरिहार्य भएकाले यसको आवश्यक तयारी मन्त्रालयले गरिरहेको उल्लेख गरे।
नीजि स्तरबाट कृषिमा काम गर्ने कम्पनीहरुको भूमिका खासगरी कृषिको डिजिटेलाइजेसन, कृषि उत्पादनको बजारीकरण, कृषि उपजको प्रशोधन, स्वदेशी उत्पादनलाई निर्यात गर्नतर्फ केन्द्रित हुन आवश्यक रहेको मन्त्री अधिकारीले बताए।
उनले सरकार र किसानबीचको खाडललाई पुर्न निजिक्षेत्रको भूमिका महत्वपुर्ण रहेको बताउँदै नीजि क्षेत्रको सहभागिताविना कृषिमा लगानी दशकले सार्थकता पाउन नसक्ने प्रस्ट पारे।
मन्त्री अधिकारीले लगानी दशकले वर्तमान शासकीय संरचनाका तीनवटै तह, कृषक, सहकारीहरु, नीजि क्षेत्र, विकास साझेदारको लगानी कृषि क्षेत्रको ब्यवसायिकरणमा केन्द्रित गर्ने अपेक्षा पनि व्यक्त गरे। कृषिमा लगानी दशकको प्रस्थान विन्दुको रुपमा स्थानीय तह, प्रदेशका जिल्ला स्थित कृषि तथा पशुपन्छी क्षेत्र हेर्ने कार्यालयहरु, प्रदेश मन्त्रालय, संघीय मन्त्रालय, कृषि अनुसन्धान परिषद तथा कृषि उद्दम केन्द्र लगायतमा लगानीका क्षेत्रहरुको पहिचान सहजीकरणका लागि डेस्क स्थापना गरिने जानकारी उनले दिए।
