काठमाडौँ- हत्या अभियोगमा करिब दुई दशकदेखि कारागारमा रहेका फ्रान्सेली नागरिक चार्ल्स शोभराज आज शुक्रबार रिहा भएका छन्। सर्वोच्च अदालत तथा जिल्ला अदालतले उनलाई कारागारमुक्त गर्न आदेश दिएसँगै उनलाई आज रिहा गरिएको हो। उनलाई नेपाल कहिल्यै आउन नमिल्ने गरी फ्रान्स पठाउन लागिएको छ। केन्द्रीय कारागारबाट मुक्त गरेर उनलाई अध्यागमन विभाग पठाइएको छ।
उमेर र स्वास्थ्य अवस्थालाई ध्यानमा राख्दै उनलाई कैद सजाय पाएको अवधिभन्दा अघि नै रिहा गरेर उनकै देश पठाउन लागिएको हो। शोभराजलाई ज्येष्ठ नागरिकले पाउने कैद छुट दिएपछि ९ महिना कैद मिनाहा दिएको हो। बुधबार सर्वोच्च अदालतले र भक्तपुर अदालतले बिहीबार सर्वोच्चकै आदेश कार्यान्वयन गर्ने फैसला सुनाएपछि उनलाई फ्रान्स फर्काउन लागिएको छ।
कुख्यात अन्तर्राष्ट्रिय अपराधी शोभराजका बारेमा उपन्यास लेखिएका छन्। फिल्म, नाटक देखि वृत्तचित्रसमेत बनेका छन्। भारतमा ‘मे और चाल्स’ चलचित्र बनेको छ। ‘सिरियल किलर’ शोभराजमाथि विश्वका विभिन्न देशमा हत्या र लागूऔषध तस्करीको अभियोग छ।
हाल भियतनाममा रहेको र तत्कालीन फ्रान्सको साइगोनमा ६ अप्रिल सन् १९४४ मा जन्मिएका शोभराज किशोरावस्थाबाट चोरी र लुटपाटमा संलग्न थिए। उनी सन् १९६३ मा पेरिसमा चोरीको अभियोगमा पक्राउ परेका थिए। जेलमा उनको ठूला अपराधीसँग संगत भएको भयो।
विभिन्न अपराधमा खोजीको सूचीमा परेपछि नक्कली कागजपत्रसहित एसियातर्फ भागेका थिए। उनी पर्यटकलाई लुट्थे । कतिपय घटनामा हत्या पनि गर्थे। शोभराज जुवाडे थिए। जुवा खेल्न पनि उनी ठूला अपराध गर्न थाले। उनी भारत, अफगानिस्तान, ग्रिसलगायतका देशमा चोरी र डकैतीको अभियोगमा पक्राउ परे। हिरासत र जेलबाटै फरार भए। उनी अपराध गर्दा हत्या गरेका वा लुटिएकाको पासपोर्ट दुरुपयोग गर्थे।
शोभराजमाथि २० भन्दा बढी पर्यटकको हत्या गरेको आरोप छ। उनी भारतमा सन् १९७६ देखि १९९७ सम्म २१ वर्ष जेल परेका थिए। भारतको चर्चित तिहाड जेलमा बस्दा उनले जेल प्रशासनलाई घूस दिएर विलासी जीवन बिताएको आरोप उनीमाथि छ।
उनी सन् २००३ मा नेपाल आउँदा पक्राउ परेका थिए। नेपालमा १९ वर्ष जेलजीवन बिताइसकेका शोभराज वृद्धावस्थामा छन्।
नेपालमा २०३२ पुस ८ मा मनहरा खोलानजिकै कोन्नी जो ब्रोन्जिचको हत्या गरेको पुष्टि भएको थियो। २८ साउन २०६१ मा काठमाडौँ जिल्ला अदालतले शोभराजलाई हत्याको ठहर गर्दै जन्मकैदको सजाय सुनाएको थियो। २०६१ सालमा काठमाडौँको एक क्यासिनोबाट पक्राउ परेका उनी जेलमा रहँदै आएका थिए।
