हिमाल प्रेस 
काठमाडौँ- संसद् भवन निर्माण निर्धारित समयभन्दा धेरै ढिलाइ भइसकेपछि सभामुख डोलप्रसाद अर्याल र राष्ट्रियसभा अध्यक्ष नारायणप्रसाद दाहाल चासो राखेका छन्।
सोमबार सहरी विकास मन्त्रालयका कर्मचारी र निर्माण कम्पनीका प्रतिनिधिसँग भएको छलफलमा सभामुख अर्यालले काम छिटो सक्न निर्देशन दिए।
यो परियोजना २०७६ असोज १८ गते ७ अर्ब ९४ करोड रुपैयाँमा तुन्डी शेख जेभीलाई दिइएको थियो। सुरुमा तीन वर्षमै सक्ने लक्ष्य राखिएको भए पनि हालसम्म ६ पटक म्याद थप भइसकेको छ।
पछिल्लो समयसीमा अनुसार आगामी जेठ ९ गतेभित्र सम्पन्न गर्नुपर्ने हुन्छ। सहरी विकास मन्त्रालयका अनुसार हालसम्म ९४ प्रतिशत काम सकिएको छ।
यसैबीच, परियोजनाको लागत संरचना पनि चासोको विषय बनेको छ। भवनको इन्टेरियरका लागि २ अर्ब ३४ करोड रुपैयाँमा केसी श्यामसुन्दर बाँनिया जेभीसँग सम्झौता गरिएको छ भने छाना निर्माणका लागि चेनलिंक इन्जिनियरिङलाई ३ करोड ८० लाख रुपैयाँको ठेक्का दिइएको छ।
छलफलमा राष्ट्रियसभाका अध्यक्ष दाहाल, प्रतिनिधिसभा उपसभामुख रूबी कुमारी र राष्ट्रियसभा उपाध्यक्ष लिला कुमारी भण्डारीको उपस्थिति रहेको थियो।
