अमेरिकाको टेक्सासमा मधेशी एकता समाजको होली

काठमाडौँ- मधेशी एकता समाज अमेरिकाको आयोजनामा टेक्सास राज्यको इरभिङमा फागुन १६ गते शनिबार होली विशेष कार्यक्रम गरेको छ।

समाजको टेक्सास च्याप्टरद्वारा आयोजित ‘होली धमाका’ कार्यक्रममा एक सयभन्दा बढी सदस्यहरूको सहभागिता थियो।

टेक्सास च्याप्टरका अध्यक्ष सुरेन्द्र रामले सम्पूर्णलाई होलीको शुभकामना व्यक्त गर्दै प्रवासमा रहेर पनि नेपाली मौलिक संस्कृति र परम्पराको संरक्षण तथा प्रवर्द्धन गर्नु सबैको साझा दायित्व भएको बताए।

कार्यक्रममा समाजका वरिष्ठ उपाध्यक्ष सञ्जय ज्यामिरे, नेपाली महावाणिज्य दूतावास डल्लासका प्रवक्ता प्रवीण भण्डारी, युलेस सिटीका उपमेयर टीका पौडेल, नेपालिज सोसाइटी अफ टेक्सासका अध्यक्ष विजय भुसाल, इन्द्रेणी समाजका अध्यक्ष नेत्र पाण्डे, समाजका अन्तर्राष्ट्रिय उपाध्यक्ष शशी यादव तथा सामाजिक अभियन्ता अमरनाथ साहलगायत विभिन्न नेपाली संघ–संस्थाका प्रतिनिधिहरूको उपस्थिति थियो।

वक्ताहरूले होली पर्वले आपसी सम्बन्ध सुदृढ बनाउने, विविधतामा एकता कायम गर्ने तथा सांस्कृतिक पहिचान जोगाइराख्ने सन्देश दिने उल्लेख गर्दै प्रवासमा रहेका नेपाली समुदायबीच सहकार्य र सद्भाव अझ सुदृढ बनाउन यस्ता कार्यक्रम महत्वपूर्ण हुने धारणा राखे।