हिमाल प्रेस 
फाइल तस्बिर
काठमाडौँ– अमेरिकी राष्ट्रपति डोनाल्ड ट्रम्पले नव गठित शान्ति बोर्डले गाजाका लागि मानवीय र पुनर्निर्माण सहायता स्वरुप पाँच अर्ब डलर सहयोग गर्ने प्रतिवद्धता व्यक्त गरेका छन्।
सामाजिक सञ्जाल मार्फत ट्रम्पले सन् २०२६ फेब्रुअरी १९, मा, शान्ति बोर्डका सदस्यहरूमा सामेल हुने र जहाँ सदस्य राष्ट्रहरूले मानवीय प्रयास र गाजाको पुनर्निर्माणलाई सहयोगको प्रतिज्ञा गरेको घोषणा गर्ने जनाएका हुन्।
गाजामा सुरक्षा कायम गर्न अन्तर्राष्ट्रिय स्थिरीकरण बल (र्आएसएफ) र स्थानीय प्रहरीमा हजारौँ कर्मचारी नियुक्त गरिएकोसमेत उनले प्रष्ट पारेका छन्।
आसन्न बैठकले शान्ति बोर्डको पहिलो आधिकारिकतालाई प्रतिविम्वित गर्ने जनाइएको छ भने अमेरिकी राष्ट्रपति ट्रम्पले यो पहल गाजाको भविष्यको निर्णायक बिन्दु भएको उल्लेख गरेका छन्।
न्युयोर्क टाइम्सले यसअघि अमेरिकाले गाजामा शान्ति बोर्ड स्थापनाको परियोजनाहरूका लागि एक अर्ब डलरभन्दा बढी रकम दिने वाचा गरेको जनाएको थियो।
ह्वाइट हाउसका एक अधिकारीले आगामी दिनमा थप प्रतिबद्धताहरू अपेक्षा गरेको जनाउँदै गत सेप्टेम्बरमा घोषणा गरिएको ट्रम्पको २० बुँदे शान्ति योजनाले युद्धविरामका लागि मार्ग प्रशस्त गर्ने र शान्ति बोर्डले कोष व्यवस्थापन गर्ने जनाएका छन्।
स्रोतका अनुसार वित्तीय प्रतिज्ञाहरूको ठुलो हिस्सा गाजामा मानवीय परियोजनाहरूका साथै आईएसएफका लागि समर्थनका लागि तोकिएको छ।
राष्ट्रपति डोनाल्ड ट्रम्पद्वारा जनवरी २२ मा सुरु गरिएको शान्ति बोर्डमा अहिले सम्म २० भन्दा बढी देश सामेल भइसकेका छन् भने बोर्डको स्थापना चार्टर स्विजरल्याण्डको डाभोसमा विश्व आर्थिक फोरमको एक समारोहमा हस्ताक्षर गरिएको थियो।-रासस/क्यूएनए
