हिमाल प्रेस 
पाकिस्तानी अधिकारीहरूले शनिबार राजधानी इस्लामाबादको शिया मस्जिदमा आत्मघाती विस्फोटमा संलग्न चार सहयोगीलाई पक्राउ गरिएको बताएका छन् । उक्त आक्रमणमा कम्तीमा ३१ जनाको मृत्यु भएको थियो । धेरैजना घाइते छन् ।
‘प्राविधिक तथा मानव गुप्तचर जानकारीका आधारमा खैबर पख्तुनख्वा प्रान्तका पेशावर र नौशेरा जिल्लामा समन्वयित छापामार कारबाही गरियो, जसबाट हमलाका पछाडि रहेका अफगान आईएसआईएसका मुख्य योजनाकारसहित चार सहयोगी पक्राउ परे,’ पाकिस्तानको आन्तरिक मन्त्रालयले सामाजिक सञ्जाल एक्समा लेखेको छ ।
मन्त्रालयले अगाडि भनेको छ, ‘प्रमाणहरूले योजना, तालिम र अतिवादी बनाउने कार्य अफगानिस्तानका आईएसआईएसले गरेको पुष्टि गर्छन् । अफगान तालिबानको संरक्षणमा रहेको आतंकवादको जाल क्षेत्रीय शान्तिका निम्ति गम्भीर खतरा बनेको छ ।’
कारबाहीका क्रममा एक सुरक्षा अधिकारीको मृत्यु र चारजना घाइते भएका मन्त्रालयले जनाएको छ । ‘हाम्रा सुरक्षा बलहरू दृढ छन्, थप गुप्तचर जानकारीमा आधारित कारबाहीहरू जारी छन्,’ मन्त्रालयले भनेको छ ।
आन्तरिकमन्त्री मोहसिन नकवीले आतंकवादी संगठनहरू अफगानिस्तानबाट सञ्चालन भइरहेका भन्दै भारतले तिनलाई आर्थिक सहयोग गरेको आरोप लगाएका छन् ।’हामी विश्वलाई के भन्न चाहन्छौँ भने, पाकिस्तान यी आतंकवादीहरूविरुद्धको पर्खाल हो । यदि, यो पर्खाल कमजोर भयो भने कोही पनि सुरक्षित रहन सक्दैन,’ उनले भने ।
भारत र अफगानिस्तान दुवैले हमलामा आफूहरूको कुनै संलग्नता नभएको जनाएका छन् । बीबीसीबाट ।
