हिमाल प्रेस 
नयाँ दिल्ली- राेयल च्यालेन्जर्स बेंगलुरुले दोस्रोपटक विमेन्स प्रिमियर लिगको उपाधि जितेको छ। टोलीले बिहीबार दिल्ली क्यापिटल्सलाई ६ विकेटले हरायो। बेंगलुरु २०२४ मा पहिलोपटक च्याम्पियन बनेको थियो भने दिल्ली लगातार चौथोपटक फाइनलमा हार बेहोर्न बाध्य भयो।
बडोदराबाट कोटाम्बी स्टेडियममा बेंगलुरुले २ बल बाँकी रहँदै २०४ रनको लक्ष्य पूरा गर्यो। यो विमेन्स प्रिमियर लिग फाइनलको सबैभन्दा ठूलो रन हो। कप्तान स्मृति मन्धानाले ८७ रनको शानदार पारी खेलिन् भने जर्जिया वोलले ७९ रन बनाइन्। दुवैले ९२ बलमा १६५ रनको साझेदारी गरिन्।
दिल्लीतर्फबाट कप्तान जेमिमा रोड्रिग्जले २७ बलमा ५७ रन बनाइन् जसमा ८ चौका समावेश थिए। लौरा वोल्वार्टले ४४ रन बनाइन् र शिनेल हेनरीले ३५ रनमा अविजित रहिन्। लिजेल लीले ३७ र शेफाली वर्माले २० रन बनाइन्। यी पारिहरूको सहयोगमा दिल्लीले विमेन्स प्रिमियर लिग फाइनलको सबैभन्दा ठूलो स्कोर बनायो तर जित हात पार्न सकेन।
कसलाई के प्राप्त भयो?
टूर्नामेन्ट जित्ने राेयल च्यालेन्जर्स बेंगलुरुले ६ करोड रुपैयाँ पुरस्कार प्राप्त गर्यो। दिल्ली क्यापिटल्सले ३ करोड रुपैयाँमा सन्तोष गर्नुपर्यो। प्रतियोगिताकी प्लेयर अफ द टुर्नामेन्ट सोफी डिभाइनलाई ५ लाख रुपैयाँ दिइयो।
राेयल च्यालेन्जर्स बेंगलुरुको प्लेइङ ११ मा स्मृति मन्धाना (कप्तान), ग्रेस ह्यारिस, जर्जिया वोल, ऋचा घोष (विकेटकिपर), राधा यादव, नादिन डी क्लार्क, पूजा वस्त्राकर, अरुन्धती रेड्डी, सयाली साटघरे, श्रेयांका पाटिल र लोरेन बेल थिए भने दिल्ली क्यापिटल्समा जेमिमा रोड्रिग्ज (कप्तान), शेफाली वर्मा, लिजेल ली (विकेटकिपर), लौरा वोल्वार्ट, मारीजान क्याप, शिनेल हेनरी, निकी प्रसाद, स्नेह राणा, मिन्नु मणि, श्री चरणी र नन्दनी शर्मा थिए।
