हिमाल प्रेस 
काठमाडौँ– सरकारी स्वामित्वको राष्ट्रिय वाणिज्य बैंकको चालु आर्थिक वर्षको प्रथम ६ महिनासम्मको निष्क्रिय कर्जा ४.५५ प्रतिशत रहेको तथा नाफा एक अर्ब ७५ करोड रुपैयाँ भएको जनाएको छ। यो अपरिस्कृत विवरण हो।
बैंकको ६१ औँ वार्षिकोत्सवका अवसरमा शनिबार आयोजित कार्यक्रममा बैंक सञ्चालक समितिका अध्यक्ष देवकुमार ढकालले उत्पादनशील क्षेत्रलाई प्राथमिकतामा राखेर बैंकले कर्जा प्रवाह गरिरहेको जानकारी दिए।
‘हाल पूँजीबजार, निर्माण, सेवा, लगानी प्रवद्र्धन एवं विकास निर्माणका क्षेत्रमा सकारात्मक संकेत देखिएका छन्, यसले अर्थतन्त्रमा आशाको सञ्चार गरेको छ,’ उनले भने।
बैंकका प्रमुख कार्यकारी अधिकृत देवेन्द्ररमण खनालले नवीन सोच र संकल्पका साथ बैंकले वित्तीय सेवा प्रवाह गर्दै आएको बताए।
कर्जा प्रवाह बढाउनु चुनौती भएको स्वीकार गर्दै उनले भने, ‘बैंकको पूँजीको आधार सुदृढ बनाउन तीन खर्ब बराबरको ऋणपत्र निष्कासनको तयारीमा रहेको छ। बैंकसँग हाल कर्जा निक्षेपको अनुपातका आधारमा एक खर्ब ७१ अर्ब रुपैयाँ तथा तरलताका आधारमा एक खर्ब ३९ अर्बको लगानीयोग्य रकम देखिए तापनि पूँजी पर्याप्ताका आधारमा थप १८ रुपैयाँ अर्ब मात्र कर्जा प्रवाह गर्ने अवस्था छ।’
कार्यक्रममा दिइएको जानकारीअनुसार बैंकले निक्षेपतर्फ ४७ लाख ४३ हजार र कर्जातर्फ दुई लाख २६ हजार भन्दा बढी ग्राहकलाई सेवा दिँदै आएको छ। चुक्ता पूँजी १५ अर्ब ६३ करोड रुपैयाँ भएको बैंकले चालु आवका ६ महिनामा कुल निक्षेप पाँच खर्ब ५३ अर्ब संकलन तथा १९ अर्ब रुपैयाँ बराबरको कर्जा प्रवाह गरेको छ।
