हिमाल प्रेस 
ग्राफिक्सः नोटबुकएलएमबाट बनाइएको।
काठमाडौँ- चालू आवको पहिलो पाँच महिनामा विद्युतीय सवारीसाधन (ईभी) आयातमा तीव्र गिरावट आएको छ। साउनदेखि मंसिरसम्म समग्र कार आयात भने सामान्य रूपमा बढेको देखिएको छ।
ईभी आयातकर्ताहरूका अनुसार अघिल्लो आर्थिक वर्षको अन्त्यतिर सम्भावित कर परिवर्तनको पूर्वानुमानमा ठूलो मात्रामा जम्मा गरिएकाले चालु वर्षको सुरुमा ईभी आयात घटेको हो।
भन्सार विभागले सार्वजनिक गरेको तथ्यांकअनुसार समीक्षा अवधिमा ईभी आयात अघिल्लो वर्षको चार हजार ६९५ युनिटबाट घटेर २३.५५ प्रतिशतले कमी हुँदै तीन हजार ८०० युनिटमा सीमित भएको छ। यस अवधिमा आठ अर्ब ९५ करोड मूल्य बराबरका ईभी आयात भएका छन्। यी आयातबाट राज्यले पाँच अर्ब ६४ करोड राजस्व संकलन गरेको छ।
आयात भएका ईभीमध्ये अधिकांश मध्यम क्षमताका सवारीसाधन रहेका छन्। ५१ देखि १०० किलोवाट क्षमताका सवारीसाधन दुई हजार १६४ युनिट आयात भएका छन्। त्यसपछि ५० किलोवाटसम्म क्षमताका एक हजार २१५ युनिट आयात भएका छन्।
१०१ देखि २०० किलोवाट क्षमताका ४१४ युनिट कार आयात भएका छन् भने २०१ किलोवाटभन्दा माथिका पाँच युनिट मात्र आयात भएका छन्। यस अतिरिक्त पाँच महिनामा ५० किलोवाटसम्म क्षमताका असेम्बल नगरिएका ईभी पनि दुई युनिट आयात भएका छन्।
सोही अवधिमा पेट्रोलबाट चल्ने सवारीसाधनको आयात उल्लेखनीय रूपमा बढेको छ। पेट्रोल कारको आयात ५०.६८ प्रतिशतले वृद्धि भई अघिल्लो आर्थिक वर्षको सोही अवधिको एक हजार ७९९ युनिटबाट बढेर दुई हजार ८०१ युनिट पुगेको छ।
यो अवधिमा देशले विद्युतीय र पेट्रोल दुवै प्रकारका कार, जिप र भ्यान गरी जम्मा ६ हजार ६०१ युनिट सवारीसाधन आयात गरेको छ। यो अघिल्लो आर्थिक वर्षको सोही अवधिको तुलनामा १.६४ प्रतिशत अर्थात् १०७ युनिटले बढी हो। अघिल्लो आर्थिक वर्षको पहिलो पाँच महिनामा कुल ६ हजार ४९४ युनिट सवारी साधन आयात भएका थिए।
यी सवारीसाधनहरूको कुल आयात मूल्य ११ अर्ब ६० करोड पुगेको छ भने सरकारले भन्सारमार्फत ११ अर्ब ५३ करोड राजस्व संकलन गरेको छ।
