हिमाल प्रेस 
काठमाडौँ- प्रगतिशील लोकतान्त्रिक पार्टी (प्रलोपा) का संरक्षक तथा पूर्वप्रधानमन्त्री डा.बाबुराम भट्टराईले देशमा वैकल्पिक राजनीतिक शक्तिहरू उदाउँदै गएको समयमा दुई फरक धारको निर्माण हुनु लोकतन्त्रका लागि सुखद् संकेत भएको टिप्पणी गरेका छन्।
मंसिर ७ गते चार राजनीतिक घटकहरूको एकताबाट प्रलोपा गठन र मंसिर १४ गते राष्ट्रिय स्वतन्त्र पार्टी (रास्वपा) र विवेकशील साझा पार्टीबीच एकता भएको प्रसंग जोड्दै उनले आइतबार सामाजिक सञ्जालमार्फत प्रतिक्रिया दिएका हुन्।
भट्टराईका अनुसार प्रलोपा मध्य–वाम (लेफ्ट अफ सेण्टर) धारमा उभिएको छ भने रास्वपा मध्य–दक्षिण (राइट अफ सेण्टर) मा आधारित देखिन्छ। ‘जुनसुकै देशमा वाम र दक्षिण धार रहेकै हुन्छन्। कहिले ‘अति’ तिर, कहिले ‘मध्य’ तिर ढल्किए पनि उनीहरूको प्रतिस्पर्धा र सहकार्यबाट नै लोकतान्त्रिक प्रणाली स्वस्थ रूपमा चल्छ,’ भट्टराईले भने।
जेनजी विद्रोहपछि परम्परागत दलप्रति जनतामा असन्तुष्टि बढिरहेको उल्लेख गर्दै उनले कांग्रेस र कम्युनिस्ट दलप्रति व्यापक वितृष्णाले नयाँ विकल्पहरूको उदयलाई सहज बनाएको बताए।
‘रास्वपा र प्रलोपा क्रमशः नयाँ र वैकल्पिक शक्तिका रूपमा उदाउँदै जानुले देशको राजनीतिलाई सकारात्मक दिशातिर लैजान सक्छ,’ उनले भने।
भट्टराईले सचेत नागरिक तथा पछिल्लो आन्दोलनका अगुवा युवा पुस्तालाई समसामयिक राजनीतिक रूपान्तरणप्रति ध्यान दिन पनि आग्रह गरेका छन्।
भट्टराईले सामाजिक सञ्जालमा व्यक गरेको धारणा
