हिमाल प्रेस 
काठमाडौँ- नेकपा एमालेको ११ औँ महाधिवेशनका लागि ईश्वर पोखरेल समूहले पदाधिकारीका उम्मेदवारी टुंगो लगाएको छ। आज बिहान बसेको समूहको बैठकले उम्मेदवार टुंगो लगाएको हो। पोखरेल समूहबाट ४ उपाध्यक्षमा गोकर्ण विष्ट, परशुराममेघी गुरुङ, विन्दा पाण्डे, अरुण नेपाल उम्मेदवार हुनेछन्।
महासचिवको उम्मेदवार सुरेन्द्र पाण्डे निश्चित भएका छन्। ३ उपमहासचिवमा योगेश भट्टराई, वैजनाथ चौधरीको नाम टुंगो लागेको छ। स्रोतका अनुसार एक उपमहासचिवको नाम टुंगो लागेपनि बाहिर ल्याइएको छैन। ९ सचिवमा रचना खड्का, विनोद ढकाल, कर्ण थापा, पुरुषोत्तम पौडेल, ठाकुर गैरे, इन्द्रलाल सापकोटा, गोकुल बास्कोटा र कृष्णगोपाल श्रेष्ठले उम्मेदवारी दिने भएका छन्। आज बेलुका उम्मेदवारी दिने कार्यसूची छ।
यता ओली प्यानलबाट भने अधिकांश नामहरू टुंगो लागेको छैन। महासचिवमा प्रदीप ज्ञवाली र शंकर पोखरेलको दाबेदारीले ढिला भएको जनाइएको छ। काठमाडौँको भृकुटीमण्डपमा जारी महाधिवेशनमा ओली र पोखरेल प्यानलको प्रतिस्पर्धा हुने भएको छ। महाधिवेशन केहीदिनदेखि जारी छ।
