हिमाल प्रेस 
पर्सा- वीरगन्ज महानगरपालिकाले रेल्वे सडकस्थित छपकैयाँमा निर्माण गरेको तरकारी तथा फलफूल बजार सञ्चालनमा ल्याएको छ। यसबाट वीरगन्जमा लामो समयदेखि रहेको थोक बजारको अभाव परिपूर्ति हुने विश्वास लिइएको छ।
वीरगन्ज महानगरका प्रमुख राजेशमान सिंहले यो बजार छपकैयाँवासीकै नाममा बनाइएको र यसलाई व्यवस्थित राख्न स्थानीयको भूमिका महत्त्वपूर्ण रहेको बताए। उनले डेढ वर्षअघि नै सञ्चालनमा ल्याउन खोजे पनि विविध कारणले ढिलो भएको जानकारी दिए।
प्रमुख सिंहले बीपी उद्यानमा रहेको अव्यवस्थित बजारका व्यवसायीका कारण पनि छपकैयाँको बजार सञ्चालनमा आउन केही समय लागेको स्पष्ट पारे। उनले अब बीपी उद्यानमा रहेको अव्यवस्थित बजारलाई हटाउने अभियान थालनी गरिने र त्यहाँका व्यवसायीलाई यहाँ स्थानान्तरण गर्नका लागि विकल्प दिइएको बताए।
पर्साका प्रमुख जिल्ला अधिकारी भोला दाहालले बजार सञ्चालनले किसान र उपभोक्ता दुवै लाभान्वित हुने बताए। उनले अब व्यवस्थित ठाउँमा खरिद-बिक्री गर्न र सवारी सञ्चालन पनि सरल हुने उल्लेख गरे।
महानगरका प्रमुख प्रशासकीय अधिकृत अरविन्दलाल कर्णका अनुसार पहिलो चरणमा ७० लाख रुपियाँको लागतमा निर्माण गरिएका १४ युनिटमा २८ वटा सटर सञ्चालनमा आएका छन्। बजार परिसरमा बिजुली, पानी, शौचालय, ढल निकास र सुरक्षा व्यवस्थासहित सबै आधारभूत सुविधा उपलब्ध छन्।
महानगरले आगामी दिनमा दोस्रो चरणमा थप ७० लाख रुपैयाँ लगानी गर्दै युनिट संख्या र भौतिक संरचना विस्तार गर्ने योजना रहेको जनाएको छ। खुद्रा र थोक कारोबारलाई अलगअलग संरचनाबाट सञ्चालन गरिने भएकाले व्यवसायीलाई दीर्घकालीन योजनासहित कारोबार गर्न सहज हुने महानगरको भनाइ छ। रासस
