हिमाल प्रेस 
काठमाडौँ- प्रगतिशील लोकतान्त्रिक पार्टी (प्रलोपा) एकतापश्चात् पहिलोपटक पार्टी केन्द्रीय कार्यालय तीनकुनेमा शुक्रबार बसेको अध्यक्ष परिषद्को बिस्तारित बैठक तथा केन्द्रीयस्तरका नेताहरूको परिचयात्मक बैठकले पार्टीको आगामी संगठनात्मक संरचना, राजनीतिक अभियान र चुनाव तयारीसम्बन्धी निर्णयहरू गरेको छ।
बैठकले मंसिर २५-२६ गते केन्द्रीय समितिको प्रथम पूर्ण बैठक सम्पन्न गर्ने निर्णय गरेको छ। त्यसअघि पार्टीको सटिक तथा कार्यकुशल विधान निर्माण, केन्द्रीय समितिको उचित आकार निर्धारण तथा विभागहरूलाई नामकाजी नभई कामकाजी बनाउने जनाएको छ।
युवाहरूलाई सक्रिय जिम्मेवारी दिने उद्देश्यसहित बैठकले प्रत्येक निर्वाचन क्षेत्रबाट सक्रिय युवालाई केन्द्रीय समितिमा समेट्ने निर्णय गरेको छ। साथै केन्द्रीय आयोग, केन्द्रीय विभागका प्रमुख-उपप्रमुख तथा प्रदेश अध्यक्ष परिषद्लाई पदेन केन्द्रीय समितिको भूमिकामा राख्ने प्रस्ताव पनि गरिएको छ।
बैठकले जेनजी आन्दोलनले उठाएका जायज मुद्दाहरू कार्यान्वयन गर्न वर्तमान सरकारलाई दबाब दिने भएको छ। साथै जनयुद्ध, जनआन्दोलन र जेनजी आन्दोलनका मुद्दा तथा उद्देश्यहरूलाई स्थापित गर्ने उद्देश्यले प्रगतिशील अभियान सञ्चालन गर्ने निर्णय गरेको छ।
आगामी निर्वाचनलाई लक्षित गर्दै बैठकले सुशासन केन्द्रित प्रचारप्रसारलाई तीव्रता दिन आईटी तथा सञ्चार प्रणालीलाई व्यवस्थित गर्ने प्रस्तावमा समेत विस्तृत छलफल गरेको छ।
