एनपीएल

पोखराले लुम्बिनीलाई दियो १५१ रनको लक्ष्य, रोसिङ्टन र निशमको अर्धशतक

हिमाल प्रेस १३ मंसिर २०८२ १३:०५
6
SHARES
पोखराले लुम्बिनीलाई दियो १५१ रनको लक्ष्य, रोसिङ्टन र निशमको अर्धशतक

काठमाडौँ- नेपाल प्रिमियर लिग (एनपीएल) को शनिबारको पहिलो खेलमा पोखरा एभेन्जर्सले लुम्बिनी लायन्सलाई जितका लागि १५१ रनको लक्ष्य दिएको छ।

कीर्तिपुरस्थित अन्तर्राष्ट्रिय क्रिकेट मैदानमा टस हारेर पहिले ब्याटिङको निम्तो पाएको पोखराले निर्धारित ओभरमा पाँच विकेट गुमाएर १५० रन बनाएको हो।

पोखराका लागि विकेटकिपर ब्याट्सम्यान एडम रोसिङ्टनले उत्कृष्ट अर्धशतकीय पाली खेले। उनले टोलीका लागि ८१ रनको योगदान गरे।

आक्रामक रूपमा प्रस्तुत भएका ओपनर ब्याट्सम्यान रोसिङ्टनले टोली अप्ठ्यारो स्थितिमा रहँदा केवल ६३ बलको सामना गरी पाँच छक्का र सात चौका पनि हिर्काए।

रोसिङ्टन १९औं ओभरको दोस्रो बलसम्म क्रिजमा टिकेका थिए। उनले अर्धशतक भने ५२ बलमा दुई छक्का र पाँच चौकाको मद्दतले पूरा गरेका थिए।

रोसिङ्टनको अर्धशतक जारी सिजनको एनपीएलमा बनेको १८औं अर्धशतक हो। उनले छैटौं नम्बरका ब्याट्सम्यान जेम्स निसमसँग ९२ रनको साझेदारी गरे।

जेम्स निसमले पनि टोलीका लागि अर्धशतकीय पाली खेले। उनले अविजित ५१ रनको योगदान गरे। अनुभवी खेलाडी निसमले केवल ३२ बलको सामना गरी तीन छक्का र तीन चौका हाने।

निसमले अन्तिम ओभरको अन्तिम ओभरको अन्तिम बलमा आफ्नो अर्धशतक पूरा गरेका हुन्। उनको अर्धशतक जारी सिजनको एनपीएलमा बनेको १९औं अर्धशतक हो।

अन्य ब्याट्सम्यानको प्रदर्शन भने सन्तोषजनक रहेन। ओपनर दिनेश खरेल ११ बलमा एक चौकाको मद्दतले सात रन बनाउँदै आउट भए। कप्तान कुशल भुर्तेल र सुमित बर्माले खाता खोल्न सकेनन्।

तृतराज दास पनि एक रनभन्दा अगाडि बढ्न सकेनन्। किरण ठगुन्ना एक रनमा अविजित रहे। पोखराले अतिरिक्त रूपमा पनि नौ रन पायो।

लुम्बिनी लायन्सका बलर शेर मल्ल र तिलक भण्डारीले दुई/दुई विकेट लिए। गुलबदिन नाइबले पनि एक विकेट लिए।

प्रकाशित: १३ मंसिर २०८२ १३:०५

प्रतिक्रिया

Leave a Reply

Your email address will not be published. Required fields are marked *

four × 5 =


© Nepali horoscope

© Gold Price Nepal

© Nepal Exchange Rates
© Nepal weather forecast