हिमाल प्रेस 
जनकपुरधाम– जनता समाजवादी पार्टी (जसपा) नेपालका अध्यक्ष उपेन्द्र यादवले सामाजिक र आर्थिक व्यवस्था परिवर्तन नभएसम्म लोकतन्त्र संस्थागत हुन नसक्ने बताएका छन।
दलित , पिछडावर्ग, थारु आदिवासी र अल्पसंख्यक (डोटिम) परिसंघको जनकपुरधाममा आयोजित जिल्लास्तरीय वृहत् अन्तरक्रिया कार्यक्रमलाई सम्बोधन गर्दै उनले यस्तो बताएका हुन्।
अध्यक्ष यादवले भने, ‘हामीले देशमा राणा शासन अन्त्य गरी राजतन्त्र हुँदै बहुदल र गणतन्त्रसम्मको व्यवस्था ल्यायौँ। तर सामाजिक व्यवस्था सदृढ बनाउन सकेनौँ। जबसम्म सामाजिक व्यवस्था परिवर्तन गर्न सक्दैनौँ तबसम्म लोकतन्त्रको कुनै अर्थ रहँदैन।’
उनले देशमा राजनीतिक परिवर्तनले मात्रै मुलुक समृद्ध हुन नसक्ने भन्दै सामाजिक र आर्थिक परिवर्तन जरुरी रहेको जिकिर गरे। यादवले अबको क्रान्ति आर्थिक र समाजिक रुपान्तरणका लागि हुनुपर्ने उल्लेख गरे।
‘जबसम्म रिक्सा चलाउने, खेतमा मजदूरी गर्ने किसान, गन्जी र लुँगी लगाएर दैनिक मजदूरी गर्ने तप्काका व्यक्तिले शिक्षा, स्वास्थ्य, रोजगार र राजनीतिक सहभागिता नपाएसम्म देशमा राजनीतिक परिवर्तन र लोकतन्त्रको कुनै अर्थ हुँदैन,’ उनले भने।
दलित, पिछडावर्ग, अल्पसंख्यकहरुको राजनीतिमा भागिदारी र सत्तामा साझेदारी नभएसम्म लोकतन्त्रको सार्थकता परिकल्पना समेत गर्न नसकिने उनको भनाइ छ।
दलित, पिछडावर्ग, अल्पसंख्यकहरु छुट्टाछुट्टै लडेर समानताको अधिकार पाउन नसक्ने भन्दै उनले एकजृुट भएर लडनका लागि डोटिम परिसंघ साझा मञ्च निर्माण गरिएको बताए।
जसपा नेपालका केन्द्रीय सहअध्यक्ष रकम चेम्जोङले समावेशीकरण, समान अवसर र पहिचानको संरक्षणलाई सुनिश्चित गर्न राज्य संयन्त्रले गम्भीर रूपमा काम गर्नुपर्नेमा जोड दिए।
डोटिम परिसंघका केन्द्रिय संयोजक चन्देश्वर पासवानको अध्यक्षतामा भएको कार्यक्रममा परिसंघका सल्लाहकार डा. पिके ठाकुरले डोटिम स्थापनाको उद्देश्य र अगामी कार्यदिशाबारे आफ्नो धारणा राखेका थिए।
