हिमाल प्रेस 
काठमाडौँ- आर्थिक वर्ष २०८२/८३ को पहिलो चार महिनामा सरकार रकम खर्च गर्ने लक्ष्य पूरा गर्न विफल भएको छ। महालेखा नियन्त्रक कार्यालयले सार्वजनिक गरेको ताजा तथ्यांकअनुसार पुँजीगत खर्च यस वर्ष पनि सबैभन्दा कमजोर रहेको छ।
चालु आर्थिक वर्षका लागि पुँजीगत खर्च शीर्षकमा विनियोजन गरिएको ४०७.८८ अर्ब रुपैयाँमध्ये कात्तिक मध्यसम्म २५.६२ अर्ब रुपैयाँ खर्च गरिएको छ। यो कुल विनियोजनको ६.२८ प्रतिशत मात्र हो। समीक्षा अवधिमा कोषबाट ४७०.१० अर्ब रुपैयाँ खर्च गरिएको छ, जुन चालु आर्थिक वर्षका लक्ष्यको २३.९ प्रतिशत हो। चालु आवका लागि सरकारले १,९६४.११ अर्ब रुपैयाँ खर्च गर्ने प्रस्ताव गरेको छ।
तलब, प्रशासनिक कामकाज तथा नियमित सरकारी गतिविधिमा खर्च हुने दोहोरो (सञ्चालन) खर्च ३२१.८९ अर्ब रुपैयाँ पुगेको छ, जुन लक्ष्यको २७.२६ प्रतिशत हो। त्यस्तै ऋण तिर्ने दायित्वसमेत समावेश गर्ने वित्तीय खर्च १२२.५८ अर्ब रुपैयाँ पुगेको छ, जुन लक्ष्यको ३२.६७ प्रतिशत हो। सरकारले आर्थिक वर्ष २०८१/८२ मा कुल खर्च लक्ष्यको ८१.८७ प्रतिशत मात्र पूरा गर्न सकेको थियो।
समीक्षा अवधिमा सरकार राजस्व संकलन लक्ष्य पनि हासिल गर्न सफल भएन। चार महिनामा सरकारले लक्ष्यको ७७.४९ प्रतिशत मात्र राजस्व संकलन गर्न गरेको छ।
महालेखाले कात्तिक मध्यसम्म ३२९.५१ अर्ब रुपैयाँ संकलन गरिएको जनाएको छ, जुन ४२५.२३ अर्ब रुपैयाँको लक्ष्यभन्दा निकै कम हो।
