हिमाल प्रेस 
काठमाडौँ– भिजिट भिसाका नाममा हुने गरेका गलत क्रियाकलाप नियन्त्रण गरी अध्यागमन प्रशासनमा सुशासन तथा व्यावसायिकता प्रवद्र्धन गर्न हाल कार्यान्वयनमा रहेको ६ बुँदे मापदण्ड र विभिन्न समयमा जारी प्रावधान खारेज गरिएको छ।
अध्यागमन विभागले भिजिट भिसामा प्रस्थान गर्ने व्यक्तिले राहदानी, प्रवेशाज्ञा, हवाई टिकट र घोषणाको कागजात पेस गरेमा प्रस्थान अनुमति दिने सहज प्रावधानसम्बन्धी मन्त्रिस्तरीय निर्णय भएको जानकारी दिएको छ।
विभागले जारी गरेको विज्ञप्तिमा भनिएको छ, ‘भिजिट भिसामा रहने यात्रुले कम्तीमा ६ महिना वैध अवधि भएको राहदानी, सम्बन्धित देशको प्रवेशाज्ञा वा ‘अनअराइभल’ प्रवेशाज्ञा प्राप्त हुने मुलुक भए प्रवेशाज्ञा नचाहिने, प्रस्थान गर्ने गन्तव्यसम्मको हवाई टिकट र आफू भ्रमण गर्ने प्रयोजनको आवश्यक कागजात साथमा रहेको तथा सिर्जित परिणाममा स्वयम् जिम्मेवार रहने स्वः घोषणा गरे पुग्नेछ।’
हाल कार्यान्वयनमा रहेको ६ बुँदै मापदण्ड पुनरावलोकन गर्न समेत सिफारिस गरिएको छ। अध्यागमन र उक्त भिसाबारे देखिएका समस्या समाधान गर्नेसम्बन्धी उच्चस्तरीय अध्ययन एवं छानबिन समिति, २०८२ ले समेत संविधानप्रदत्त नागरिकका मौलिक हक, व्यक्तिको मानवअधिकार र स्वतन्त्रतापूर्वक आवतजावत गर्न पाउने अधिकारको प्रत्याभूति गर्न तथा स्वार्थ समूहका चलखेललाई निरुत्साहित गर्नुपर्ने सुझाव प्रस्तुत गरेको थियो।
विभागद्वारा जारी विज्ञप्तिमा भनिएको छ, ‘यो व्यवस्था आजैका मितिदेखि कार्यान्वयन हुने भएकाले सबै नेपाली नागरिकलाई कुनै पनि बिचौलियाको प्रभावमा नपरी आफ्नो गन्तव्य र यात्राको बारेमा पूर्णरुपमा सुसूचित भई निर्धक्क भई यात्रा गर्न अनुरोध छ।’
विभागले सबै स्थानीय तह र जिल्ला प्रशासन कार्यालयबाटसमेत यस सूचनालाई सबै नागरिकसम्म सम्प्रेषण तथा सुसूचित गराउने कार्यमा सहयोग गरिदिन अनुरोध गरेको छ।
विभिन्न उद्देश्यका लागि विदेश जान चाहने नेपाली नागरिकको प्रस्थान र आगमनलाई व्यवस्थित गर्ने सम्बन्धमा अध्यागमन ऐन, २०४९, अध्यागमन नियमावली, २०५१ तथा अध्यागमन कार्यविधि, २०६५ विद्यमान रहेका छन्।
भिजिट भिसामा प्रस्थान गर्ने नेपाली नागरिकको प्रस्थानलाई सहजीकरण गर्ने प्रयोजनका लागि विभिन्न समयमा कार्यविधि परिमार्जन तथा मापदण्ड र परिपत्रहरू जारी गरी व्यवस्थित गर्ने प्रयास हुँदैआएको विभागले जनाएको छ।
भिजिट भिसामा जान नागरिकलाई हैरानी र अनियमितताका कारक बनेका गुनासा कायमै रहेको यथार्थतालाई आत्मासात् गरी अध्यागमन प्रशासनले सोही विन्दुबाट नै सुधारका काम निरन्तर अगाडि बढाइरहेको विषय विभागले स्पष्ट गरेको छ।
अध्यागमन नियमन र सहजीकरणबीच उपयुक्त सन्तुलन कायम गरी राष्ट्रिय सुरक्षाका चुनौतीलाई सम्बोधन गर्न सक्ने गरी अध्यागमन प्रशासनलाई सुदृढ बनाउने र अध्यागमन प्रशासनमा पूर्ण रुपमा सुशासन कायम गर्ने कार्यलाई विभागले आफ्नो मुख्य कार्यभारको रुपमा अगाडि बढाएको विज्ञप्तिमा उल्लेख छ।
यसअघि भिजिट भिसामा अध्यागमन अधिकारीहरूले सबै सोधपुछ गरेर मात्रै पठाउँथे। कहाँ जाने, के खाने, कसकहाँ बस्ने, कहिले फर्कने, कति पैसा बोकेको छ जस्ता प्रश्न सोधेर अधिकारीहरूले विदेश हिँडेकालाई हैरान पार्ने गरेको आरोप लाग्दै आएको छ। अब भने टिकट, होटल, घुम्ने ठाउँ आदिका बारेमा व्यक्ति आफैँले स्वघोषणा गरेपछि जान पाइने भएको छ।
