गृहमन्त्रीसहित ३ मन्त्री आज मधेश जाँदै, दुईदिन त्यतै रहने

काठमाडौँ- शान्ति सुरक्षाको अवस्था र चुनावका लागि आवश्यक तयारीबारे जानकारी लिन गृहमन्त्री ओमप्रकाश अर्याल आज मधेश प्रदेशको भ्रमणमा जाने भएका छन्।

मन्त्री अर्यालसँगै भ्रमणदलमा उद्योग र कानुनमन्त्री अनिलकुमार सिन्हा, युवा तथा खेलकुद मन्त्री बब्लु गुप्ता र गृहसचिव रामेश्वर दंगाल पनि छन्।

आगामी फागुन २१ गते हुने प्रतिनिधि सभाको निर्वाचनका लागि आवश्यक सुरक्षा व्यवस्थाबारे बुझ्न जनकपुर प्रस्थान गर्ने कार्यक्रम तय भएको छ।

सोमबार र मंगलबार गरी उनीहरू दुई दिन मधेशमा रहने प्रधानमन्त्रीको सचिवालयले जनाएको छ। त्यस क्रममा उनीहरूले सुरक्षा निकायका विभिन्न कार्यालय अवलोकन, सरकारी कार्यालयका प्रमुखहरूसँग अन्तर्क्रिया गर्नेछन्। मन्त्रीहरू छठसम्बन्धी कार्यक्रममा पनि सहभागी हुनेछन्।