हिमाल प्रेस 
काठमाडौँ- नेकपा माओवादी केन्द्र र नेकपा एकीकृत समाजवादीबीच पार्टी एकीकरणका विषयमा सहमति जुटेको छ। स्रोतका अनुसार अब नेतृत्व टुंग्याउने जिम्मा माओवादी संयोजक पुष्पकमल दाहाल ‘प्रचण्ड’ र नेकपा एसका अध्यक्ष माधवकुमार नेपाललाई दिइएको छ।
दुवै पार्टीबीच सिद्धान्त, नीति तथा कार्यक्रममा सहमति भइसकेको छ। नयाँ पार्टीको मार्गदर्शक सिद्धान्त मार्क्सवाद-लेनिनवाद रहनेछ भने कार्यनीति नेपाली विशेषतासहितको समाजवाद हुनेछ। माओवादी केन्द्रले माओवाद त्याग्ने र नेकपा एसले जबजका आधारभूत मूल्यहरूलाई समाजवादभित्र समेट्ने सहमति भएको छ।
पार्टीको नामबारे अन्तिम टुंगो लाग्न बाँकी छ तर नेपाल कम्युनिस्ट पार्टी समाजवादी वा नेकपा समाजवादी नाम रहने सम्भावना बढी छ।
नेतृत्वका लागि प्रचण्ड संयोजक र माधव नेपाल सहसंयोजक बन्ने प्रस्ताव अघि सारिएको छ। विप्लव नेतृत्वको नेकपालाई पनि समेट्ने प्रयास जारी छ। निर्वाचन आयोगको तोकिएको म्यादअघि नै एकता घोषणा गर्ने तयारी भएको छ।
