भ्रष्टाचार गरेको छैन, शंका लागेमा मेरो सम्पत्ति छानबिन गरियोस् : केपी ओली

काठमाडौँ- नेकपा एमालेका अध्यक्ष केपी शर्मा ओलीले आफ्नोसहित शंका लागेका सबैको सम्पत्ति निष्पक्ष ढंगबाट छानबिन गर्न माग गरेका छन्। आफूले भ्रष्टाचार नगरेको दाबी उनले गरे।

प्रेस चौतारी नेपालद्वारा आज आयोजित सम्पादकसँगको संवाद कार्यक्रममा निवर्तमान प्रधानमन्त्रीसमेत रहेका अध्यक्ष ओलीले आफूले एक पैसा पनि भ्रष्टाचार नगरेको र सुशासनका पक्षमा सदैव दृढ रहेको जनाउँदै सम्पत्ति छानबिनका लागि आफू तयार रहेको बताए।

उनले बेथिति, विकृति र भ्रष्टाचार अन्त्यसहित सुशासन र सामाजिक सञ्जाल सञ्चालनको मुद्दा उठाएर जेनजी समूहले गरेको शान्तिपूर्ण आन्दोलनमा घुसपैठ भई धनजनको क्षति भएको बताए।

‘म कुनै आवेग र आक्रोशमा भन्दा सत्य स्थापित होस् भन्ने चाहन्छु। म हरेक नागरिकले सम्मानजनक जीवन बाँच्न पाउनुपर्छ र मुलुकमा समृद्धि, समानता र शान्ति कायम हुनुपर्दछ भनी देश र जनताप्रति सदैव बफादर हुँदै आएको छु। सत्यप्रतिको मूल्यमान्यताबाट कहिल्यै विचलित हुन्न’, ओलीले भने, ‘सत्यको पक्ष लिँदा अहङ्कार र दम्भको भाषा बोल्यो भन्ने पर्न सक्छ । उक्त घटनाको यथार्थ क्रमशः खुल्दै जाला, हामी जनताको शान्ति, न्याय र लोकतन्त्रका पक्षमा कसैसँग सम्झौता नगरी लागिरहने छौँ ।’

निर्वाचनको सहज वातावरण नभएको आशङ्का गर्दै एमाले अध्यक्ष ओलीले विघटित प्रतिनिधिसभाका पुनःस्थापनाका पक्षमा आफ्नो पार्टी रहेको बताए।