रोशनकुमार झाको कृति ‘नेपाल मण्डलसँग जोडिएको सिम्रौनगढको इतिहास’ विमोचन

पैरवी बुक हाउसले आयोजना गरेको कार्यक्रमका प्रमुख अतिथि नेपाल प्रज्ञा-प्रतिष्ठानका कुलपति भूपाल राई थिए। उनले इतिहासको गहिरो अध्ययन र पुनःपाठको आवश्यकता औँल्याउँदै सिम्रौनगढ र नेपाल मण्डलबीचको ऐतिहासिक सम्बन्धबारे अझ अनुसन्धान गर्नुपर्ने बताए।

उनले भने, ‘सरकार फेरिए पनि इतिहास मेटिँदैन र फेरिँदैन। सिम्रौनगढको इतिहासको गहिराइ बुझ्न थप खोज र अनुसन्धान अपरिहार्य छ। किरात सभ्यता र नेपाल मण्डलबीचको अन्तक्रिया अझ खोतलिनुपर्ने विषय हो।’

राष्ट्रिय समाचार समिति (रासस) का कार्यकारी अध्यक्ष धर्मेन्द्र झाले राष्ट्रको इतिहास चिनाउने मेरुदण्डका रूपमा पुस्तक रहेको उल्लेख गर्दै इतिहास लेखनको परिप्रेक्ष्य अझ समावेशी, तथ्यपूर्ण र आलोचनात्मक हुनुपर्नेमा जोड दिए। ‘हामी इतिहास लेख्छौँ तर सिम्रौनगढजस्ता ऐतिहासिक क्षेत्र अझै पनि नेपाली इतिहासको मूलधारमा पूर्ण रूपमा समाहित भएका छैनन्। इतिहास राम्रोसँग लेख्न सके मात्र हामी नेपाललाई इतिहासमा सही ढंगले चिनाउन सक्छौँ,’ उनले भने।

कार्यकारी अध्यक्ष झाले नेपाल मण्डलले अझै पनि सिम्रौनगढलाई ऐतिहासिक र सांस्कृतिक दृष्टिकोणले स्वीकार गर्न नसकेको गुनासो गरे। उनले भने, ‘नेपाललाई राम्रो ढंगले चिनाउने हो भने इतिहास राम्रोसँग लेख्नु जरुरी छ। नेपाल मण्डलले जसरी सिम्रौनगढलाई जसरी स्वीकार गर्नुपर्ने हो त्यो गर्न सकेको छैन। हाम्रो इतिहास पुनर्लेखन गर्न आवश्यक छ।’

कार्यक्रममा लेखक रोशनकुमार झाले पुस्तक लेखनको प्रेरणा, उद्देश्य र अनुसन्धान प्रक्रियाबारे जानकारी गराउँदै सिम्रौनगढ क्षेत्रको ऐतिहासिक महत्व अझै पनि गहिरो रूपमा नबुझिएको उल्लेख गरे । उनले आफ्नो कृति नेपाल मण्डल र सिम्रौनगढबीचको ऐतिहासिक सम्बन्धका नयाँ पाटा उजागर गर्ने प्रयास भएको बताए।

अन्य सहभागीहरूले नेपालको ऐतिहासिक सहर सिम्रौनगढ र त्यसको नेपाल मण्डलसँगको सम्बन्धजस्ता ऐतिहासिक क्षेत्रलाई राष्ट्रिय पाठ्यक्रममा समावेश गर्नुपर्ने र यस्ता अनुसन्धानात्मक कृतिहरूलाई प्रोत्साहन गर्नुपर्ने धारणा राखे। कार्यक्रममा नेपाल बार एशोसियसनका अध्यक्ष प्रा.डा. विजयप्रसाद मिश्र, वरिष्ठ पत्रकार सुधीर शर्मा, संस्कृतिविद् जगमान गुरुङ, इतिहासविद् प्रा. डा. पुरुषोत्मलोचन श्रेष्ठ, नागरिक अगुवा कनकमणि दीक्षितलगायतको उपस्थिति थियो।