इटहरीमा स्कारपियोको ठक्करबाट मजदुरको मृत्यु

इटहरी- इटहरी उपमहानगरपालिका-९ स्थित कोशी लोकमार्गमा स्कारपियोको ठक्करबाट एक मजदुरको मृत्यु भएको छ ।

बुधवार बेलुका करिब ७ः२० बजेतिर इटहरीबाट विराटनगरतर्फ जाँदै गरेको को २ च ८६३ नम्बरको स्कारपियोले बाटो काट्दै गरेका पैदलयात्रीलाई ठक्कर दिएको हो । ठक्करबाट विराटनगर–१२ घर भई इटहरीस्थित भवानी प्लाई फ्याक्ट्रीमा काम गर्दै आएका ४० वर्षीय अच्युतप्रसाद बरालको मृत्यु भएको हो ।

गम्भीर घाइते भएका उनीलाई इटहरी अस्पतालमा प्रारम्भिक उपचारपछि थप उपचारका लागि बीपी कोइराला स्वास्थ्य विज्ञान प्रतिष्ठान धरान पठाइएको थियो । उपचारका क्रममा साँझ करिब राति ९ बजेतिर मृत्यु भएको प्रहरीले जनाएको छ । दुर्घटनामा संलग्न स्कारपियो र चालक मोरङ सुन्दरहरैंचा–८ निवासी २२ वर्षीय संजय सग्रौलालाई प्रहरीले नियन्त्रणमा लिएको छ । घटनाबारे थप अनुसन्धान भइरहेको प्रहरीको भनाइ छ ।