हिमाल प्रेस 
काठमाडौँ- इलाम नगरपालिका–६ मा पहिरोमा परी मृत्यु भएका ६ जनाको पहिचान खुलेको छ। जिल्ला प्रहरी कार्यालयका अनुसार मृत्यु हुनेमा २३ वर्षीय समिर देउसाली, २३ वर्षीय प्रबिन पाख्रिन, २३ वर्षीय विराज पाख्रिन, ३२ वर्षीया अनु तामाङ तथा ३२ वर्षीया प्रनिशिका मगर र चार वर्षीय आरुष दनुवार रहेका छन्।
इलाममा बाढीपहिरोमा परी मृत्यु हुनेको संख्या २८ पुगेको छ। सशस्त्र प्रहरी बलका अनुसार पहिरोमा पुरिएर माइजोगमाई गाउँपालिका-५ प्याङमा आठजना, इलाम नगरपालिका-६ मा ६ जना र सूर्योदय नगरपालिका-१ मा पाँचजनाको मृत्यु भएको छ।
यसैगरी माङसेबुङ गाउँपालिका-१ पाटीगाउँमा तीन, सन्दकपुर गाउँपालिकामा तीन, देउमाई नगरपालिका-५ धुसेनीमा दुई र फाकफोकथुम गाउँपालिका-१ रातमाटेमा एकजनाको ज्यान गएको छ।
सशस्त्र प्रहरी बलका अनुसार देउमाई-५ धुसेनीस्थित दीपक लिम्बूको घर पहिरोले पुरिएर नाम नखुलेको दुईजनाको मृत्यु हो। यसैगरी माङसेबुङ गापा ५ स्थित पार्टीगाउँमा मदन लिम्बूको घर पहिरोले पुरिँदा तीनजनाको मृत्यु भएको छ। घटनाका सम्बन्धमा थप विवरण आउन बाँकी छ।
