साउन यता अख्तियारमा हालसम्म ६ हजार ७८६ वटा उजुरी दर्ता

काठमाडौँ– अख्तियार दुरुपयोग अनुसन्धान आयोगमा चालु आर्थिक वर्षको हालसम्म ६ हजार ७८६ वटा उजुरी दर्ता भएका छन् ।

आयोगका अनुसार आर्थिक वर्षको पहिलो महिना साउनमा मात्र ३ हजार ९२२ वटा उजुरी परेका थिए । तीमध्ये आयोगको वेबसाइटमार्फत १ हजार १७६ वटा उजुरी दर्ता भएका छन् । आयोगले उजुरी र गुनासो आफ्नै वेबसाइटमार्फत पनि लिने व्यवस्था गरेको छ ।

साउन महिनामा इमेलमार्फत दर्ता हुने उजुरी सबैभन्दा बढी ९४३ रहेका छन् । त्यस्तै, ८८९ वटा लिखित निवेदन, ६५३ वटा हुलाकमार्फत र १५१ वटा टेलिफोनमार्फत उजुरी परेका छन् ।

भदौ महिनामा आयोगमा २ हजार २७६ उजुरी दर्ता भएका छन् । तीमध्ये ७१७ वटा उजुरी आयोगको वेबसाइटमार्फत दर्ता भएका छन् ।

सोही अवधिमा लिखित निवेदन र इमेलमार्फत दर्ता भएका उजुरी बराबरी ५२४/५२४ छन् भने हुलाकमार्फत ३६६ वटा उजुरी दर्ता भएका छन् ।

यस्तै, असोज १३ गतेसम्म आयोगमा ५८८ वटा उजुरी दर्ता भएको आयोगले जनाएको छ ।