हिमाल प्रेस 
इटहरी- कोशी प्रदेशको प्रदेशसभा बैठक दसैँपछि मात्रै बस्ने भएको छ। प्रदेशका आन्तरिक मामिला तथा कानुन मन्त्रालयमा मंगलबार आयोजित सर्वदलीय बैठकले वर्तमान राजनीतिक र भौतिक अवस्थाको मूल्यांकन गर्दै प्रदेशसभाको बैठक दसैँपछि मात्र सम्भव हुने निर्णय गरेको हो।
प्रदेशसभाको भवन जेनजी आन्दोलनका कारण ध्वस्त भएपछि नयाँ विकल्प खोज्ने प्रक्रिया सुरु गरिएको सरकारका प्रवक्ता एवम् आन्तरिक मामिला तथा कानुन मन्त्री रेवतीरमण भण्डारीले जानकारी दिए। उनका अनुसार विराटनगरको कृषि बजार भवन र वीरेन्द्र सभागृहलाई विकल्पको रूपमा प्रयोग गर्नेबारे छलफल भएको छ।
प्रदेशका भौतिक पूर्वाधार विकास मन्त्री भुपेन्द्र राईले वर्तमान सभा हलमा आगलागी भएका कारण अन्य स्थानमा बैठक आयोजना गर्नेबारे विचार गरिरहेको बताए। यसबीचमा प्रदेशका प्रमुख दलहरूले बैठकको पुनःसम्भावनाबारे सहमति जनाएका छन्।
नेपाली कांग्रेस, नेकपा एमाले, नेकपा माओवादी केन्द्र र नेकपा एकीकृत समाजवादी दलका प्रमुख सचेतकहरू बैठकका अनिवार्य पक्षमा रहेको र आगामी भविष्यका योजनामा सँगै काम गर्न सहमत भएका छन्।
बैठकको स्थायित्व र प्रभावकारीता सुनिश्चित गर्न नयाँ स्थानको व्यवस्था गर्नुपर्ने बताइएको छ। बैठकमा प्रदेशसभाका सभामुख अम्बरबहादुर विष्ट, उपसभामुख सिर्जना राईसहित दलका नेताहरू सहभागी थिए।
