काठमाडौँ- नक्खु कारागारमा रहेका राष्ट्रिय स्वतन्त्र पार्टी (रास्वपा) सभापति रवि लामिछानेले सोमबार राजधानीमा भएको गोलीकाण्डलाई ‘नेपाली इतिहासको सबैभन्दा कालो दिन’ भन्दै सरकारविरुद्ध आक्रोश व्यक्त गरेका छन्। उनले निर्दोष विद्यार्थीमाथि गोली प्रहार गर्ने सरकारलाई कुनै हालतमा माफी दिन नहुने बताएका छन्।
कारागारभित्रैबाट जारी गरेको अपिलमा सभापति लामिछानेले सत्ता पक्षलाई ‘आततायी, क्रूर र भ्रष्ट’ भन्दै अब एक मिनेट पनि सत्तामा रहन नदिने जनमत बनेको दाबी गरेका छन्। उनका अनुसार स्कुले पोसाकमा रहेका विद्यार्थीलाई ताकी–ताकी गोली हानेको घटनाले सरकारको क्रुरता उजागर भएको छ।
लामिछानेले चारबुँदे मागसमेत सार्वजनिक गरेका छन्। उनका माग यस्ता छन्- सकेसम्म छिटो Gen Z सहितको अन्तरिम नागरिक सरकार गठन, २०४६ सालपछि भएका सबै नीतिगत निर्णयको समीक्षा र उच्चपदस्थ तथा तिनका परिवारको सम्पत्ति छानबिन गर्ने आयोग गठन, संविधान संशोधन वा पुनर्लेखनका लागि विज्ञहरूको उच्चस्तरीय समिति गठन र भदौ २३ को घटनाबारे प्रधानमन्त्रीदेखि गृहमन्त्रीसम्मको भूमिका छानबिन गर्न न्यायिक आयोग गठन।
‘देश आन्दोलन होइन, क्रान्तिमा प्रवेश गर्दैछ’, भन्दै उनले आन्दोलनलाई अझै संयमित र शान्तिपूर्ण ढंगले अघि बढाउन युवापुस्तासँग अपिल गरेका छन्। घाइतेहरूको शीघ्र स्वास्थ्यलाभ र मृतकका परिवारप्रति समवेदना प्रकट गर्दै उनले, ‘यो बलिदान खेर जानु हुँदैन, क्रान्ति देश बदल्ने तहमा पुग्नुपर्छ’, भनेका छन्।
अपिलमा उनले गृह मन्त्रालयमा आफूले अनुसन्धान गर्ने भनिएका २५ वटा फाइल अझै अल्मलिएको भन्दै तिनलाई खोजेर अघि बढाउन आग्रह गरेका छन्। साथै आफ्ना विरुद्धका मुद्दा गृहमन्त्री रमेश लेखक बनेपछि मात्र दर्ता गरिएको दाबी गर्दै उनले यसलाई राजनीतिक प्रतिशोधको परिणाम भनेका छन्।
रास्वपा सांसदहरूलाई सम्बोधन गर्दै लामिछानेले भनेका छन्, ‘उल्लेखित मागहरू पूरा नभए संसदबाट राजीनामा दिनुपर्ने हुन सक्छ, तयार रहनुहोस्।’
नक्खु कारागारबाट सभापति रवि लामिछानेको हार्दिक अपिल
आदरणीय दाजुभाई तथा दिदीबहिनीहरू,
आज भदौ २३ गते कुशासन र भ्रष्टाचारका नाइकेहरुले १९ भन्दा बढी कलिला विद्यार्थीको रगत पिए र सयौँलाई घाइते बनाए । यी आततायीहरुलाई अब कुनै माफी दिन सकिँदैन, न अब बाँकी एक मिनेट पनि यिनलाई सत्तामा झेल्न सकिन्छ ।
आफ्नै बिन्दास संसारमा रमाउने उमेर का Gen Z लाई सडकमा आउन कसले बाध्य पाऱ्यो ? यिनै आततायीका सनक, कुशासन र भ्रष्टाचारले । यिनीहरु अयोग्य, भ्रष्ट मात्र होइन अत्यन्त क्रुर पनि छन् भन्ने तथ्य स्कुले पोशाक लगाएका ती निर्दोष, निरपराध र अबोध बालबालिकालाई के थाहा ? सिपालु सिकारीले चरा मारेझैँ यिनीहरुले कलिला केटाकेटीहरुलाई ताकि-ताकि गोली हानेर मारे । म स्तब्ध र विक्षिप्त भएको छु, यो नेपाली इतिहासको सबैभन्दा कालो दिन हो ।
Gen Z र सिंगो देशलाइ मेरो अपिल छ, अब आततायीहरुलाई एक मिनेट पनि सत्तामा रहन दिनुहुन्न । यिनीहरुकै वर्चस्व रहेको संसदसँग पनि अब जनादेशको वैधता छैन । आफ्नै अपराधबाट तर्सिएर बनेको र तर्साएर जोगाएको यो सरकार इतिहासकै कलंकित बनेर सकिएको छ । कालकोठरीबाट भएपनि जिम्मेवार राजनीतिक नेताका रूपमा यो विषम परिस्थितिमा मैले देशलाई केही समाधान सुझाउनैपर्छ । ती यस्ता छन् :
१) सकेसम्म छिटो Gen Z सहितको अन्तरिम नागरिक सरकार गठन होस् ।
२) ०४६ सालपछिका सबै नीतिगत निर्णयको समीक्षा होस् । त्यसयताका सबै उच्चपदस्थ र तीनका परिवारको सम्पत्तिको छानबिन गर्ने गरी आयोग गठन होस् ।
३) आगामी संसदबाट अनुमोदन हुने गरी संविधान संशोधन वा पुनर्लेखनका लागि विज्ञहरुको उच्चस्तरीय समिति बनोस् ।
४) आजको हत्याकाण्डको छानबिनका लागि न्यायिक आयोग बनोस् र त्यसले प्रधानमन्त्रीदेखि गृहमन्त्रीसम्मका अपराधहरुको अनुसन्धान गरोस् ।
यी आततायीलाई अझै यो देश लुट्न र जनताका सन्तानको हत्या गर्न दिन सकिन्न । देशलाई ३८ वर्षसम्म लुटेका यिनको अनुहार अब त निर्दोष, निरपराध र अबोध केटाकेटीका रगतले समेत राताम्य भइसकेको छ । यिनीहरु शासन होइन, दण्डका भागेदार हुन् । सबै Gen Z शहिदका परिवारप्रति मेरो हार्दिक समवेदना छ । सबै घाइतेहरूको शीघ्र स्वास्थ्य लाभको कामना गर्दछु । इतिहासले एक दिन यो बलिदानको हिसाब र न्याय खोज्नेछ ।
देश आन्दोलन होइन, क्रान्तिमा प्रवेश गर्दैछ भनेर हामीले शान्तिपूर्ण रुपमा उपस्थिति जनाएका थियौँ। यिनले सुनेनन् , टेरेनन् बरु उल्टो नागरिक आवाज बन्द गर्नतिर लागे । अझै पनि क्रान्तिलाई संयमित र शान्तिपूर्ण बनाउन सकिन्छ र म सबैलाई संयमित हुन हार्दिक अपिल गर्दछु । यो क्रान्ति केवल यी आततायीहरुलाई दण्डित गर्न मात्र होइन, देश बदल्ने तहमा पुग्नुपर्छ । नत्र Gen Z को बलिदान खेर जानेछ । मेरो हातमा हत्कडी लागे पनि तपाईँहरुका हातले यिनका हातबाट तस्करले दिएको घडी खोस्नुहोला । यिनले जोगाएका आफ्ना पार्टीका अपराधीहरू र यिनले बन्द गरेका फाइलहरूको धुलो टक्टक्याउनु होला । गृह मन्त्रालयको एउटा दराजमा मैले अनुसन्धान गर्ने भनी संसदमा प्रण गरेको २५ वटा काण्डको लिस्ट छ । खोज्नु होला, खोस्नु होला । नबिर्सनु होला, ममाथि लागेका सबै मुद्दाहरु रमेश लेखक गृहमन्त्री भएपछि मात्रका हुन् ।
उल्लेखित मागहरू पूरा नभए संसदबाट राजीनामा दिन पर्ने हुनसक्छ । तयार रहनुहोला ।
(आज दिउँसो नक्खु कारागारबाट निजी सचिवालयसँगको टेलिफोन वार्ता पश्चात्, आज दिनभरि भेटघाट बन्द गरियो, ५ बजेपछि टेलिफोन सम्पर्क समेत बन्द गरिएको छ: सचिवालय)
हिमाल प्रेस 
रवि लामिछाने। फाइल तस्बिर
