८४ को निर्वाचनमा राप्रपा पहिलो पार्टी बन्छ : लिङ्देन

झापा– राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले आगामी निर्वाचनमा राप्रपा मुलुकको पहिलो पार्टी बन्ने दाबी गरेका छन्।

उनले आगामी निर्वाचनमा राप्रपा पहिलो पार्टी बन्ने भन्दै त्यसै अनुसार तयारी थाल्न नेता तथा कार्यकर्तालाई आग्रह गरेका हुन्।

पार्टीको ११ औँ जिल्ला अधिवेशनलाई शनिबार विर्तामोडमा सम्बोधन गर्दै उनले राप्रपा २०८४ को निर्वाचनमा मुलुकको पहिलो पार्टी बन्ने दाबी गर्दै जनताले पार्टीप्रति आशा गरेका उल्लेख गरे।

अध्यक्ष लिङ्देनले संविधान संशोधन गरेर प्रत्यक्ष निर्वाचन प्रणालीबाट कार्यकारी प्रधानमन्त्री चुन्ने व्यवस्था गर्न माग गरे। उनले भ्रष्टाचार र भ्रष्ट प्रवृत्तिविरुद्ध पार्टीभित्र र बाहिर राप्रपाले कुनै सम्झौता नगर्ने धारणा राखे। पार्टीभित्र अनुशासन नमान्ने र अवसरमात्र खोज्नेहरू अब सचेत हुनुपर्ने उनको भनाइ छ।

‘राप्रपा एउटा पार्टी मात्र होइन, भ्रष्टाचारविरुद्धको अभियान पनि हो। पार्टी बलियो भएमा मुलुक समृद्ध बन्छ। राप्रपा भ्रष्टाचार र भ्रष्ट व्यवस्थाविरुद्ध सदैव उभिने छ,’ उनले भने।

राप्रपाका प्रवक्ता एवं प्रमुख सचेतक ज्ञानेन्द्रबहादुर शाहीले मुलुकको अवस्था बदल्न देशको व्यवस्था बदल्नुपर्ने खाँचो औँल्याए। ‘हाम्रा पुस्ताका लागि पनि मुलुकको अवस्था र व्यवस्था दुवै बदल्नुपर्ने जरुरी छ, यसका लागि पार्टीले सडक र सदनबाट अगुवाइ गर्नेछ,’ उनले भने।

पार्टीकी केन्द्रीय सदस्य खुश्वु ओलीले आफूहरूकै पालामा देश बनाउने हो भने राप्रपाले आगामी निर्वाचनमा बहुमत ल्याएर सरकारको नेतृत्व गर्नुपर्ने धारणा राखिन्।