रुपन्देही उपनिर्वाचनको मुखमा ठूलो संख्यामा एमाले प्रवेश, प्रवेश गर्नेहरु भ्रष्टाचार आरोपी

बुटवल– रुपन्देही क्षेत्र नम्बर ३ उपनिर्वाचन नजिकिँदै गर्दा रुपन्देही सम्मरीमाई गाउँपालिकाका पूर्वअध्यक्ष जितेन्द्र शुक्ला (बब्लु) र मर्चवारी गाउँपालिकाका पूर्वअध्यक्ष केशव नन्द बाँनियासहितका नेताहरू एमाले प्रवेश गरेका छन्।

शनिबार मर्चवारमा एक कार्यक्रमका बीच नेकपा एमालेका उपाध्यक्ष तथा उपप्रधान एवं अर्थमन्त्री विष्णु पौडेलले उनीहरूलाई पार्टीमा स्वागत गरेका हुन्।

प्रवेश गर्ने नेताहरु भने रुपन्देही निर्वाचन क्षेत्र न. ४ का हुन्। शुक्ला चारपटक दल परिवर्तन गरेका र भ्रष्टाचारको आरोपमा अख्तियारमा मुद्दा खेपेका नेता हुन्। राष्ट्रिय प्रजातन्त्र पार्टी (राप्रपा) बाट राजनीति सुरु गरेका शुक्लाले सबैजसो पार्टी चहारीसकेका छन्।

२०७४ को स्थानीय तह चुनावमा उनी विजय गच्छदार नेतृत्वको तत्कालीन मधेशी जनअधिकार फोरम लोकतान्त्रिकबाट पालिका अध्यक्षमा निर्वाचित भएका थिए। त्यसपछि ०७९ मा माओवादीमा प्रवेश गरेर पुनः गाउँपालिका अध्यक्ष उम्मेदार बनेर पराजित भएका थिए। पराजित भएपछि उनी जनता समाजवादी पार्टी नेपाल हुँदै जनमत पार्टीमा प्रवेश गरी २०७९ को चुनावमा उनी प्रदेश सभाको उम्मेदवार भए। तर पराजित भएका थिए।

यस्तै अर्का बाँनिया विरुद्ध २०७९ चैतमा गैरकानुनी सम्पत्ति आर्जन गरी भ्रष्टाचार गरेको अभियोगमा अख्तियारले विशेष अदालतमा मुद्दा दायर गरेको थियो। स्रोत नखुलेको सम्पत्तिबराबर बाँनियालाई ९१ लाख ८६ हजार ५४३ रूपैयाँ ३० पैसा बिगो जफत र जरिवाना असुल गर्न मागदाबीसहित मुद्दा दर्ता भएको थियो।

बाँनिया ०७४ मा उपेन्द्र यादव नेतृत्वको पार्टीबाट पालिका अध्यक्ष जितेका हुन् भने ०७९ मा लोसपाबाट लडे पनि हारेका थिए।

मर्चवारको असुरैनामा आयोजित कार्यक्रममा उपप्रधानमन्त्री तथा अर्थमन्त्री एवं उपाध्यक्ष पौडेलले एमाले देशको नेतृत्व गर्न सक्ने पार्टी भएको भन्दै पार्टीमा जनता र नेताहरूको आकर्षण बढिरहेको उल्लेख गरे।

उनले बलियो पार्टीविना देशको विकास सम्भव नभएको बताउँदै पूर्वअध्यक्षहरू एमालेमा प्रवेश गरेको बताए। पौडेलले मर्चवारको विकासको जिम्मा एमालेलाई दिन आग्रह गरे। उनले भने, ‘आगामी २–४ वर्षभित्र मर्चवार क्षेत्रलाई बुटवल, भैरहवा र लुम्बिनी जस्तै बनाउछौँ।’

कार्यक्रममा बोल्दै एमाले उपाध्यक्ष पौडेल, पोलिटब्यूरो सदस्य लिला गिरी, नेता तुलसीप्रसाद चौधरी, सुनिता ठटेर लगायतले बोल्दै देशको विकास एमालेले गर्ने बताए।

उक्त अवसरमा ठूलो समूह एमालेमा प्रवेश गरेका थिए। एमाले रुपन्देही जिल्ला उपाध्यक्ष हितराज पन्थीका अनुसार मर्चवारबाट हजारौँ स्थानीय एमाले प्रवेश गरेका छन्।