चीन पुगेर के भने मोदीले?

काठमाडौँ-  भारतीय प्रधानमन्त्री नरेन्द्र मोदी चीन पुगेका छन्। मोदी झन्डै सात वर्षपछि चीन भ्रमणमा गएका हुन्। उनी चीनको तियानजिनमा आयोजना हुन लागेको सांघाई सहयोग संगठन (एससीओ) शिखर सम्मेलनमा भाग लिन त्यहाँ पुगेका हुन्।

चीन पुग्नेबित्तिकै प्रधानमन्त्री मोदीले सामाजिक सञ्जाल एक्समा लेखेका छन्,‘तियानजिन आइपुगेको छु। अब सांघाई सहयोग संगठन शिखर सम्मेलनका बैठक तथा विभिन्न मुलुकका नेताहरूसँग भेटघाटको प्रतिक्षा गरिरहेको छु।’

दुईदिवसीय जापान भ्रमणबाट सोझै चीन पुगेका उनी आइतबार हुने एससीओ शिखर सम्मेलनमा सहभागी हुनेछन्।

भारतको विदेश मन्त्रालयले जारी गरेको प्रेस विज्ञप्तिअनुसार मोदीले सम्मेलनका क्रममा विभिन्न मुलुकका नेताहरूसँग द्विपक्षीय भेटघाट गर्ने कार्यक्रम छ। भारत सन् २०१७ देखि सांघाई सहयोग संगठनको सदस्य बनेको हो। प्रधानमन्त्री मोदी र चिनियाँ राष्ट्रपति सी जिनफिङबीच अघिल्लो भेट गत वर्ष अक्टाबेरमा रूसमा भएको थियो।

सन् २०१८ पछि मोदीको यो पहिलो चीन भ्रमण हो। लद्दाख सीमामा अप्रिल २०२० अघि उत्पन्न परिस्थिति अभै साम्य हुन नसकेको बेला मोदी चीन पुगेका हुन्। यद्यपि चीन भारतको दोस्रो ठूलो व्यापारिक साझेदार रहेको छ। गत वर्ष भारत र चीनबीचको द्विपक्षीय व्यापार करिब १२७.७ अर्ब अमेरिकी डलरसम्म पुगेको थियो।