जनार्दन-स्मृति संस्कृत-दिवस भव्यतापूर्वक सम्पन्न

काठमाडौँ- डीएवी विद्यालयले ८औँ जनार्दन-स्मृति संस्कृत-दिवसको भव्यतापूर्वक आयोजना गरेको छ। डीएवी विद्यालय, जावलाखेलमा बिहीबार सम्पन्न उक्त कार्यक्रममा देशका विभिन्न स्थानबाट संस्कृत गुरुकुल तथा संस्कृतसमेत अध्यापन हुने आधुनिक निजी विद्यालय गरी २१ शैक्षिक संस्थाहरूको सहभागिता थियो।

सो अवसरमा नेपाल संस्कृत विश्वविद्यालयका प्राध्यापक डा. जगतप्रसाद उपाध्याय प्रमुख अतिथिको रूपमा उपस्थित थिए भने डीएवीकै अध्यक्ष अनिल केडिया, उपप्राचार्य रामचन्द्र खनाल, स्व. जनार्दन घिमिरेकी धर्मपत्नी श्रीमती रीता घिमिरे, नेपाल संस्कृत विश्वविद्यालयका सहप्राध्यापक डा. प्रेमराज न्यौपाने तथा स्व. जनार्दन घिमिरेकै पूर्व सहकर्मी संस्कृत-अभियन्ता एवं त्रिभुवन विश्वविद्यालयका उपप्राध्यापक रोहिणीराज तिमिल्सिनाले कार्यक्रमको शोभा बढाएका थिए।

प्रतिस्पर्धात्मक कार्यक्रम-अन्तर्गत संस्कृत वक्तृत्वकला, श्लोकवाचन र भजनगायन गरी तीनवटा अन्तर्विद्यालयीय प्रतियोगिता सञ्चालन गरिएको थियो। भजनगायनमा १३ विद्यालय, श्लोकवाचनमा २१ विद्यालय सहभागी र संस्कृत वक्तृत्वकलामा १० विद्यालयका बालबालिका सहभागी थिए।

निर्णायकमण्डलमा क्रमशः श्लोकवाचनका लागि ने.सं.वि.का सहप्रा डा. प्रेमराज न्यौपाने, डीएवी नेपाली विभागका प्रमुख नारायण खतिवडा र सङ्गीतप्रशिक्षक सरोज अधिकारी थिए भने संस्कृत वक्तृत्वकलाका लागि डीएवी विद्यालयका संस्कृतविभागीय पूर्व प्रमुख एवं त्रि.वि. संस्कृतका उपप्रा. रोहिणीराज तिमिल्सिना, सुश्री शान्ता कुमारी थापा र सुदर्शन अधिकारी थिए।

भजनगायनतर्फ वरिष्ठ सङ्गीतकर्मी राजु सिंह, डीएवी हिन्दी विभागका प्रमुख पुरुषोत्तम पोखरेल र रामहरि पौडेल थिए।

संस्कृत वक्तृत्वकला प्रतियोगितामा वाग् गुरुकुलकी आँचल बसेलले प्रथम स्थान हासिल गरिन् भने महेश-संस्कृत-गुरुकुलम्‌का विनयश्री सापकोटाले दोस्रो स्थान, संस्कृत माध्यमिक विद्यालयका महेन्द्र आचार्यले तेस्रो स्थान र नैमिषारण्य-संस्कृत-गुरुकुलम्‌का प्रणव ढुङ्गेलले प्रोत्साहन पुरस्कार प्राप्त गरे।

नेपाल वेद विद्याश्रमका अनिश त्रिपाठीले उत्कृष्ट वक्ता घोषित भए। श्लोकवाचन प्रतियोगितामा नेपाल वेद विद्याश्रमले प्रथम स्थान हासिल गऱ्यो भने त्यसपछि महेश-संस्कृत-गुरुकुलम्, जगद्गुरु आदर्श-संस्कृत-गुरुकुलम् र जुगल-नव-गुरुकुलम् क्रमशः दोस्रो, तेस्रो र प्रोत्साहन स्थानमा रहे।

श्रीवेङ्कटेश-गुरुकुलम् विद्यालयका निर्मल खनालले स्वरमाधुर्य उपाधि प्राप्त गरे। भजनगायनमा एपेक्स लाइफ स्कुलले प्रथम स्थान हासिल गऱ्यो भने नैमिषारण्य-संस्कृत-गुरुकुलम् दोस्रो र पाणिनि विद्यालय तेस्रो स्थानमा रहे। जुगल-नव-गुरुकुलम्‌की खुशी बीकेले प्रोत्साहन स्थान जितिन्। गायनमाधुर्य उपाधि नेपाल वेद विद्याश्रमलाई प्रदान गरियो। समग्र नतिजामा नेपाल वेद विद्याश्रमले प्रथम स्थान हासिल गर्दै ८औँ जनार्दन-स्मृति संस्कृत-दिवस राष्ट्रव्यापी अन्तर्विद्यालयीय प्रतियोगिताको रनिङ ट्रफी प्राप्त गर्‍यो।

प्रमुख अतिथि प्रा. डा. उपाध्यायले स्व. जनार्दन घिमिरेलाई संस्कृतका अथक साधक र योगदानकारी विद्वान्‌का रूपमा स्मरण गर्दै उनको शब्द-सन्दोह ग्रन्थ र गौरीशङ्कर संस्कृतग्रामको स्थापनायोजनाजस्ता कार्यलाई उल्लेखनीय योगदानका रूपमा प्रस्तुत गरे। उनले स्वामी दयानन्द सरस्वतीको पश्चिममा वैदिक संस्कृतिको प्रचारप्रसार पनि स्मरण गर्दै संस्कृत केवल भाषा नभई संस्कृति, विज्ञान र सभ्यताको प्रतीक भएको धारणा व्यक्त गरे।

समापनसत्रका सभाध्यक्ष अनिल केडियाले आफ्ना पिता स्व. शङ्करलाल केडियाद्वारा संस्कृतशिक्षाको संरक्षणका लागि गरेको प्रयासलाई स्मरण गर्दै संस्कृतको अध्ययनले आध्यात्मिक, नैतिक, अनुशासित र सुसंस्कृत जीवनशैली निर्माण गर्ने विचार व्यक्त गरे।

उनले स्व. जनार्दन घिमिरेसँगको आत्मीय सम्बन्धलाई स्मरण गर्दै संस्कृतको संवर्द्धन सबै विद्यालय र विद्वान्‌हरूको साझा दायित्व भएको कुरामा जोड दिए।

उपप्राचार्य रामचन्द्र खनालले कार्यक्रममा उपस्थिति जनाएका अतिथि तथा सहभागीहरूलाई धन्यवाद दिँदै स्व. जनार्दन घिमिरेको संस्कृतग्रामको स्थापनासङ्कल्पलाई निरन्तरता दिनु आवश्यक रहेको विचार व्यक्त गरे।

समापनसत्र डीएवी संस्कृत विभागका प्रमुख पुरुषोत्तम रिजाल र विभागकै सदस्य शिक्षक निरञ्जन खतिवडाले सञ्चालन गरेका थिए। ८औँ जनार्दन-स्मृति संस्कृत-दिवसले संस्कृतभाषा, साहित्य र सभ्यताको संरक्षण तथा प्रवर्द्धनमा महत्त्वपूर्ण योगदान पुर्‍याएको आयोजक डीएवी विद्यालयले जनाएको छ।