एकीकृत समाजवादीका लागि ओली ठूलो समस्या बने : नेपाल

काठमाडौँ- नेकपा एकीकृत समाजवादीका अध्यक्ष माधवकुमार नेपालले आफ्नो पार्टीका लागि ठूलो समस्या केपी ओली रहेको बताएका छन्।

शुक्रबार पार्टीको काठमाडौँ क्षेत्र नम्बर ७ निर्वाचन क्षेत्रीय कमिटीले काठमाडौँमा आयोजना गरेको कार्यक्रममा अध्यक्ष नेपालले अहिलेको परिस्थितिमा पार्टीका सामु ठूलो समस्याका रुपमा एमाले नेतृत्व विशेषगरि केपी ओली नै रहेको बताएका हुन्।

कांग्रेसलाई शत्रु बनाउने, माओवादीसँग दोस्ती तोड्ने र पार्टीलाई एक्लै बनाइ कमजोर बनाउने सोच गलत रहेको उनले बताए। उनले पूर्वराष्ट्रपति विद्यादेवी भण्डारीलाई ६ महिनाअघि सदस्यता दिँदै अध्यक्षको आश्वासन दिने व्यक्ति नै अहिले भण्डारीविरुद्ध लागेको जिकिर गरे।

अध्यक्ष नेपालले आफ्नो पार्टीभित्र केही नेताहरुले गडबडी गरिरहेको भन्दै अनुशासनहीन कार्य स्वीकार गर्न नसक्ने बताए।

उनले पार्टी नेतृत्वविरुद्ध असहमति भए महाविधेशनमा सामना गर्न चूनौति समेत दिए।