नेपालगन्ज नाइट रनका विजेताले थाइल्याण्डको बाङ्सेन रनमा दौडन पाउने

नेपालगन्ज- नेपालगन्ज १० नाइट रन विजेताले थाइल्याण्डको बाङ्सेनमा हुने विश्वस्तरीय रनिङ इभेन्टमा सहभागिता जनाउने अवसर पाउने भएका छन्।

नेपालगन्ज १० नाइट रनको मातृ इभेन्ट धारा नेपालगन्ज म्याराथनका संस्थापक टीएस ठकुरी र बाङ्सेन सिरिजका संस्थापक एवं प्रबन्ध निर्देशक रुट जिरोअजवानिचकर्नबीच सो विषयमा समझदारी पत्रमा हस्ताक्षर भएको हो।

पर्यटकीय सहर बाङ्सेनमा वर्षमा तीनवटा विश्वस्तरीय रनिङ इभेन्ट आयोजना हुने गर्दछन्। बाङ्सेन २१ विश्व एथलेटिक्सको प्लेटिनम लेभलको इभेन्ट हो भने बाङ्सेन ४२ र बाङ्सेन १० इलाइट लेभल इभेन्ट हुन्।

समझदारीअनुसार नेपालगन्ज म्याराथनको सिफारिसमा जाने खेलाडी, अफिसियल लगायतलाई बाङ्सेन सिरिजमा निःशुल्क दर्ताका साथै आतिथ्यता गरिनेछ। बाङ्सेन सिरिजको सिफारिसमा नेपालमा नेपालगन्ज म्याराथनले सोही सुविधा प्रदान गर्नेछ।

‘यो सहमतिले नेपाली धावक, आयोजक, अफिसियललगायतलाई सिक्ने अवसर मिल्नेछ,’ धारा नेपालगन्ज म्याराथनका संस्थापक टीएस ठकुरीले भने, ‘छिमेकी देशमै विश्वस्तरीय म्याराथन आयोजना भइरहेका छन्, यसको लाभ लिनेतर्फको अग्रसरता हो।’

बाङसेनको सिफारिसमा थाइल्याण्डबाट आउने पाहुनालाई नेपालगन्ज म्याराथन, नेपालगन्ज १० नाइट रन, काठमाडौं २५ हेरिटेज रेस, कर्णाली हाफ म्याराथन, नेपाल इन्टरनेसनल रनिङ कन्फ्रेन्समा सहभागी गराइने ठकुरीले जानकारी दिए। यी सबै नेपालगन्ज म्याराथनकै सिरिज हुन्।

वर्ल्ड रनिङको साझा संस्था एसोसियसन अफ इन्टरनेसनल म्याराथन एण्ड डिस्टेन्स रेस (एम्स)बाट प्रमाणीकरण भएको नेपालकै सबैभन्दा सरल रुटमा हुने नेपालगन्ज नाइट रन हरेक असोज ३ गते (सेप्टेम्बर तेस्रो साता) संविधान दिवसका अवसरमा हुने गर्छ, जहाँ नेपालकै पहिलो एम्स सदस्य धारा नेपालगन्ज म्याराथन ११ वर्षदेखि निरन्तर हुँदै आएको छ।

बाङ्सेनसँगको साझेदारीपछि नेपालगन्ज म्याराथनका विजेता सहभागी हुने अन्तर्राष्ट्रिय दौडको संख्या बढेको छ।

यसअघि नेपाल रन (यूके) सँगको सहकार्यमा विश्व प्रसिद्ध लण्डन म्याराथनमा विगत दुई वर्षदेखि अवसर दिँदै आएको छ। यस वर्षदेखि विश्व प्रतिष्ठित भ्यालेन्सिया म्याराथनमा सहभागी गराउने तयारी भइरहेको नेपालगन्ज म्याराथनका संस्थापक ठकुरी बताउँछन्। उनका अनुसार यस वर्षदेखि जापानको ओसाका म्याराथनमा समेत अवसर दिने तयारी छ। नेपालगन्ज म्याराथनको छातामुनि करिब आठ वटा इभेन्ट वार्षिक रूपमा नियमित आयोजना भइरहेका छन्।

यसमा गौघाट ग्रीन रन (असोज २८), राप्तीसोनारी नेचर रन (कात्तिक १) गते सञ्चालन गर्ने तयारी छ। त्यसै गरी धारा नेपालगन्ज म्याराथन मंसिर ६ गते शनिवार (नोभेम्बर तेस्रो साताको शनिबार) हुँदैछ भने त्यसको अघिल्लो दिन नेपालगन्ज कनक्लेभको पाँचौँ संस्करण हुनेछ।

त्यस्तै कर्णाली हाफ म्याराथन मंसिर अन्तिम शनिबार, काठमाडौं २५के हेरिटेज रेस मे १ मा हुनेछ। एम्ससँगको सहकार्यमा नेपाल इन्टरनेसनल रनिङ कन्फ्रेन्स अप्रिल मसान्तमा हुनेछ। एम्सको दुई वटा पूर्णकालीन सदस्यता लिने नेपालगन्ज नेपालको एक मात्र सहर हो।