जापान पुगे मोदी, चिनियाँ परेडमा ओली सहभागी हुने मोदी नजाने

काठमाडौँ- भारतीय प्रधानमन्त्री नरेन्द्र मोदी दुई दिवसीय भ्रमणका लागि शुक्रबार जापान पुगेका छन्। चीनमा हुन लागेको सांघाई सहयोग संगठनको शिखर सम्मेलनमा भाग लिनुअघि मोदी जापान पुगेका हुन्।

टोकियोमा उनको जापानी समक्षी शिगेरु इशिबासँग वार्ता गर्ने कार्यक्रम छ। शनिबारसम्म जापान भ्रमणमा रहने प्रधानमन्त्री मोदीले अरू बैठकहरूमा सहभागिता जनाउनेछन्।

वार्ताहरू विशेष रणनीतिक र विश्वव्यापी साझेदारीतर्फ केन्द्रित हुने मोदीले बताएका छन्। उनले भनेका छन्, ‘वार्ता विशेष रणनीतिक र विश्वव्यापी साझेदारीको अर्को चरणलाई आकार दिनमा केन्द्रित हुनेछ, जसले पछिल्ला ११ वर्षमा निरन्तर र महत्त्वपूर्ण प्रगति गरेको छ।’

मोदीले दुईपक्षीय सहकार्यलाई नयाँ उचाइमा पुर्‍याउनुका साथै आर्थिक तथा लगानीसम्बन्धी दायरा विस्तार गर्ने विषयमा समेत छलफल हुने बताएका छन्। ‘हामी हाम्रो सहकार्यलाई नयाँ उचाइमा पुर्‍याउने, आर्थिक तथा लगानीसम्बन्धी सम्बन्धहरूको दायर र महत्त्वाकांक्षालाई विस्तार गर्ने, साथै एआई र सेमी-कन्डक्टरसहितका नयाँ तथा उदाउँदो प्रविधिहरूमा सहकार्यलाई अगाडि बढाउने प्रयास गर्नेछौँ,’ उनले भने। जापानी समकक्षी इशिबासँग हुने भारत-जापान शिखर सम्मेलनमा दुवै पक्षले संयुक्त वक्तव्य जारी गर्नेछन्।

जापान भ्रमणपछि प्रधानमन्त्री मोदी चीन प्रस्थान गर्नेछन्। उनी ३१ अगस्त र १ सेप्टेम्बर (१६ गते) मा तियानजिनमा हुने सांघाई सहयोग संगठन (एससीओ) को वार्षिक शिखर सम्मेलनमा सहभागी हुनेछन्। १ सेप्टेम्बरमा उनको चिनियाँ राष्ट्रपति सी जिनफिङसँग द्विपक्षीय भेटवार्ता हुने बताइएको छ। शिखर सम्मेलनमा सहभागी भएर प्रधानमन्त्री मोदीको स्वदेश फर्किने कार्यक्रम छ।

शिखर सम्मेलनलगत्तै चीनमा आयोजना हुन लागेको एउटा परेड यतिबेला विश्वजगतमा चर्चाको विषय बनेको छ। त्यो परेड हो- चीनको जनयुद्धमार्फत जापानी आक्रमणविरूद्धको प्रतिरोध र विश्व फासीवादविरोधी युद्धमा विजयको ८० औँ वार्षिकोत्सव।

परेड ३ सेप्टेम्बर (भदौ १८ गते) मा बेइजिङमा हुन लागेको हो। परेडमा चिनियाँ राष्टपति जिनफिङका साथै उत्तर कोरियाका राष्ट्रपति किम जोङ उन, रूसका राष्ट्रपति ब्लादिमिर पुटिनलगायतका नेताहरूले सहभागिता जनाउने बताइएको छ। यसका साथै प्रधानमन्त्री ओली पनि यो परेडमा सहभागी हुने कार्यक्रम छ। परेडमा सहभागी भएर ओलीसहितको प्रतिनिधिमण्डल त्यही दिन स्वदेश फर्किनेछ।

शक्ति राष्ट्रका प्रमुखहरू एकैसाथ सहभागी हुने परेडलाई जापानले आफूविरूद्धको कदमsf रूपमा ठानेको छ। यो परेडमा नेताहरूको सहभागितालाई विश्वले नियालेर बसिरहेको छ। कूटनीतिक ‘चलाखी’ देखाउँदै भारतीय प्रधानमन्त्री मोदी भने यो परेडमा सहभागी नहुने भएका छन्। चीन र जापानसँगको सम्बन्धलाई बिग्रिन नदिन उनी परेडमा सहभागी नहुने निर्णय गरेको बुझिएको छ।

चीनसँग सुध्रिन लागेको सम्बन्धलाई कायम राख्न मोदीले संघाई सम्मेलनमा सहभागिता जनाउँदै छन्। त्यस्तै जापानलाई नबिच्काउन उनी परेडमा सहभागिता नजाउने निर्णयमा पुगेको बताइएको छ।

यता विभिन्न परियोजनामा जापानसँग सहयोग लिइरहेको नेपालले चीनमा हुने परेडमा ओलीको सहभागितापछि दुई देशबीचको सम्भावित सम्बन्ध चासोका साथ हेरिएको छ।