भड्किलो भोजमा सहभागी गगन थापासामु सोझिएको प्रश्न

काठमाडौँ- राजनीति शब्द नै ‘जनसेवा र जिम्मेवारी’ सँग जोडिएको विषय हो। नेपाली राजनीतिमा फेरि एकपटक पैसाको प्रदर्शन, असमानताको तस्बिर र नेताको नैतिकताको प्रश्न सतहमा आएको छ। यसपटक चर्चामा छन् कांग्रेसका महामन्त्री गगनकुमार थापा।

रामेछापका नेता भरत चौलागाईको जन्मदिन काठमाडौँमा आइतबार भव्य भोजसहित मनाइयो। बिहानदेखि मध्यरातसम्म चलेको भोजमा चौलागाईले एकैपटक ४० भन्दा बढी केक काटेको भिडियो सामाजिक सञ्जालमा भाइरल भएको छ। त्यो दृश्य सामाजिक सञ्जालमा आलोचनाको विषय बन्यो। वास्तविक बहस चौलागाईमा होइन, उनलाई साथ दिन प्रमुख अतिथि बनेका महामन्त्री थापाको उपस्थितिलाई लिएर भएको छ।

थापा सामान्यतया सादगी, सुधार र जवाफदेहिता पक्षधर नेताका रूपमा परिचित छन्। तर यिनै थापाले भड्किलो भोजमा उपस्थित भएर त्यो छवि कमजोर पारेका छन्। उक्त भड्किलो भोजमा थापाको व्यक्तिगत उपस्थिति मात्र होइन, सामाजिक र राजनीतिक दृष्टिले पनि उचित थिएन।

थापामाथि  उठेको पहिलो प्रश्न नैतिकताको हो। जनता महँगी, बेरोजगारी र असमानताबाट आक्रान्त छन्। त्यही बेला नेताले भव्य भोजमा उपस्थित भएर शक्ति र पैसाको प्रदर्शनलाई वैधता दिने हो भने त्यस्तो अवस्थामा जनताले नेतासँग के अपेक्षा गर्ने?

दोस्रो प्रश्न समानताको हो। चक्रे मिलनले ठूलो भोज गर्दा प्रहरीको डण्डा झेल्नुपर्छ। तर चौलागाईजस्ता राजनीतिक कार्यकर्ताको भव्य भोजमा प्रहरी मौन बस्छ। यो राज्य संयन्त्रको दोहोरो मापदण्डको स्पष्ट उदाहरण हो। अनि त्यही समारोहमा प्रमुख अतिथि भएर बस्ने थापाले के सन्देश दिन खोजेका हुन्?

तेस्रो प्रश्न नेतृत्वको हो। चौलागाईजस्ता कार्यकर्ताले आफ्नै आम्दानीमा त्यस्तो भव्य भोज गर्न सक्दैनन् भन्ने तथ्य स्वाभाविकै हो। मामुली कार्यकर्ताले आफ्नो जन्मदिन त्यसरी पार्टी प्यालेसमा बिहानदेखि राति अबेरसम्म मनाउने पैसाको स्रोत के हो? उनी कसको संरक्षणमा छन्? त्यस्तो संरक्षण कांग्रेसकै शीर्ष नेताबाट भइरहेको हो भने त्यो पार्टी र थापाको नैतिकता दुवैका लागि संकटको विषय हो।

चौलागाई नेपाली कांग्रेस रामेछापका महासमिति सदस्य हुन्। रामेछाप कांग्रेसका एक पुराना नेताका अनुसार जनमोर्चा हुँदै विभिन्न दलमा आबद्ध रहेर अन्ततः कांग्रेसमा सक्रिय भए र १४ औँ महाधिवेशनमा महासमिति सदस्य निर्वाचित भएका थिए।

चौलागाईले के व्यवसाय गर्छन् भन्ने अर्को खोजीको विषय हुन सक्छ। यस प्रकरणमा भने सम्पूर्ण प्रश्नहरूको निसानामा महामन्त्री थापा छन्। चौलागाईको सयौँ समर्थकको उपस्थितिमा ४० वटा केक काट्ने शैलीले भन्दा बढी थापाको मौन उपस्थितिले जनमानसलाई झस्काएको हो। जब सादगीको प्रतीक ठानिएका नेता भड्किलो संस्कृतिको संरक्षकझैँ देखिन्छन्, त्यसले राजनीतिक आस्था कमजोर पार्छ।

कुनै व्यक्तिको जन्मोत्सव त्यति चासोको विषय होइन। तर जब त्यो उत्सव भड्किलो हुन्छ, त्यसमा प्रमुख राजनीतिक नेता सहभागी हुन्छन् र प्रहरी मौन बस्छ, त्यो सार्वजनिक सवाल बन्छ। यस प्रकरणले फेरि देखाएको छ- नेपाली राजनीतिमा ठूलो समस्या नेताको व्यक्तिगत व्यवहारमै छ। जब नेताले उत्सवलाई जिम्मेवार ढंगले मनाउँदैनन्, असमानता बढ्छ र जनताको भरोसा टुट्छ। गगन थापाले अब जवाफ दिनैपर्छ : उनी सादगीका पक्षधर नेता हुन् कि भड्किलो प्रदर्शनलाई समर्थन गर्ने अर्को अनुहार?