भैँसीको मासु निर्यात थप सहज बनाउन चीनसँग सरकारको आग्रह

काठमाडौँ- नेपालले भैँसीको मासु निर्यातका लागि भन्सार प्रशासनमा सहजीकरण र लचकता अपनाउन चीनसमक्ष आग्रह गरेको छ। कृषि तथा पशुपन्छी मन्त्रालयका उच्च अधिकारी र चीनको भन्सार प्रशासनका अधिकारीबीच बिहीबार काठमाडौँमा भएको द्विपक्षीय बैठकमा नेपालले गरेको आग्रहलाई चिनियाँ पक्षले सकारात्मक रूपमा लिएको छ।

बैठकमा नेपालको नेतृत्व कृषि तथा पशुपन्छी विकासमन्त्री रामनाथ अधिकारीले गरेका थिए भने चीनको भन्सार प्रशासनका उपमन्त्री वाङ लिङजुनले चिनियाँ पक्षको नेतृत्व गरेका थिए।

नेपालबाट थर्मल रूपमा प्रशोशित भैँसीको मासु र भैँसीको कार्टिलेज (कुरकुरे हाड) निर्यातका अतिरिक्ति दुग्ध पदार्थहरु घिउ, नौनी, बटर तथा छुर्पी चीन निर्यातका लागि कृषि मन्त्रालयले जोड गरिरहेको छ।

त्यस्तै हेलेज साइलेज पशु आहरा निर्यातका लागि पनि द्विपक्षीय बैठकमा नेपालले कुरा राखेको मन्त्री अधिकारीले जानकारी दिए। नेपालले कुखुराको मासु र पन्जा, तरकारी, फलफूल, चिया तथा कफी र जडीबुटी निर्यातका लागि सक्षम रहेको र यसका लागि थप सहजीकरण गरिदिन पनि आग्रह गरेको छ।

हाल नेपालबाट ३४ प्रकारका कृषि वस्तु ६१ वटा कम्पनीमार्फत निर्यात हुँदै आएको छ। त्यस्तै हरियो घाँस हेलेज ५ वटा कम्पनीमार्फत चीन निर्यात हुँदै आएको भन्सार विभागको तथ्यांक छ। नेपालले पशु आहार साइलेज निर्यातका लागि पनि चीनसँग प्रस्ताव गरेको छ।

बैठकमा चीनका भन्सार प्रशासनका उपमन्त्री वाङले चीनले नेपालबाट कृषि वस्तु निर्यातको विषयलाई उच्च महत्त्व दिएको बताए। उनले बैठकमा भने, ‘एक सयभन्दा बढी देशहरूबाट यस्ता प्रस्ताव आउने गरे पनि छिमेकी मुलुकका रुपमा हामीले नेपाललाई महत्त्व दिएर प्रयास अघि बढाएका छौँ।’

सिन्धुलीमा भैँसीको मासु प्रशोधन गर्ने उद्योग सञ्चालन गर्न उद्योग विभागबाट २० अर्ब रुपैयाँ लगानीको प्रत्यक्ष वैदेशिक लगानी (एफडीआई) स्वीकृत भएको छ।

चीनको सिचुवान प्रान्तस्थित छेन्दु जियान फुड कम्पनीले मरिण गाउँपालिका–४ सिन्धुलीमा उक्त उद्योग स्थापनाको प्रस्ताव गरेको हो। उद्योगले वार्षिक २ लाख टन मासु र ५५ हजार टन सहायक उत्पादन (छाला, भित्री अंग, टाउको उत्पादन) गर्ने लक्ष्य राखेको छ। उद्योगले ५ हजार १ सय ५६ जनालाई रोजगारी दिने र वार्षिक डेढ खर्ब रुपैयाँको मासु चीन निर्यात हुने लक्ष्य राखिएको छ।

२०८१ पुसमा नेपालबाट चीनमा राँगा–भैँसीको मासु निर्यात गर्न दुई देशका कम्पनीबिच सम्झौता भएको थियो। चीनको सांघाई जियान फुड प्रालि र नेपालको हिमालयन फुड इन्टरनेसनलबीच भएको सम्झौताअनुसार चिनियाँ कम्पनी जियानले नेपाली कम्पनी हिमालयन फुडमार्फत नेपालमा राँगा-भैँसीपालन, मासु प्रशोधन र निर्यातका लागि लगानी गर्नेछ। व्यावसायिक भैँसीपालन, नश्ल सुधार, अन्तर्राष्ट्रिय स्तरको बधशाला निर्माण, मासु प्रशोधन हुने उद्योग स्थापनालगायतमा लगानी गरिने सम्झौतामा उल्लेख छ।