माओवादीको केन्द्रीय कार्यालय र स्थानीय तहमा धर्ना दिँदै महासंघ, विधेयक नसच्याए सशक्त आन्दोलन

काठमाडौँ- नेपाल शिक्षक महासंघले विद्यालय शिक्षा विधेयक, २०८० प्रति विमति जनाउँदै आज देशव्यापी धर्ना कार्यक्रम गरिरहेको छ।

महासंघका राष्ट्रिय समिति अध्यक्ष लक्ष्मीकिशोर सुवेदीका अनुसार बिहान ११ बजेदेखि दिउँसो १ बजेसम्म काठमाडौँको पेरिसडाँडास्थित नेकपा माओवादी केन्द्रको पार्टी कार्यालय अगाडि धर्ना कार्यक्रम आयोजना गरिएको छ।

यससँगै देशभरका ७५३ वटै स्थानीय तहमा समेत एकैसाथ धर्ना कार्यक्रम हुने सुवेदीले जानकारी दिए। कार्यक्रममा सहभागी भई एकताबद्ध उपस्थित रहन उनले सबै शिक्षक तथा सरोकारवालालाई आग्रह गरेका छन्।

शिक्षक महासंघले शिक्षा विधेयकले शिक्षकमाथि अन्याय गरेको र सार्वजनिक शिक्षा प्रणालीलाई कमजोर बनाउने खतरा रहेको भन्दै निरन्तर विरोधका कार्यक्रम घोषणा गर्दै आएको छ।

महासंघका अध्यक्ष सुवेदीले विधेयकले शिक्षकहरूको सेवासुविधा, स्थायित्व र अधिकारलाई कमजोर बनाएको बताए। गत वैशाखमा एक महिनासम्म चलेको आन्दोलन ९ बुँदे सहमतिपछि स्थगित भएको थियो तर भदौ ६ मा प्रतिनिधिसभामा पेस भएको विधेयकमा ती सहमतिसहित विगतका सम्झौता कार्यान्वयन नभएकाले महासंघ पुनः आन्दोलनमा होमिएको अध्यक्ष सुवेदीको भनाइ छ।

महासंघले २०७५, २०७८, २०८० र २०८१–८२ मा सरकारसँग भएका सहमति लागू गर्न, अस्थायी शिक्षकका लागि ७५ प्रतिशत आन्तरिक र २५ प्रतिशत खुला पदपूर्ति (हालको ६०–४० प्रतिशत को सट्टा), आवधिक बढुवा, म्याद सकिएको अध्यापन अनुमतिपत्रको नवीकरण, विद्यालय कर्मचारीको तलब र पद, बालकक्षा शिक्षकको सेवा, संस्थागत विद्यालयका शिक्षकको सुरक्षा, द्वन्द्वपीडित शिक्षकको उपदान र शिक्षक दरबन्दी स्थानीय तहमा हस्तान्तरणको विरोध गरेको छ।