बाबुरामले स्मरण गरे अर्थ र प्रधानमन्त्री हुँदा कृषि क्षेत्रमा गरेका कामहरू, भन्छन्-हामी गफ होइन,गरेर देखाउँछौं

काठमाडौँ- नेपाल समाजवादी पार्टी (नयाँ शक्ति) का अध्यक्ष तथा पूर्वप्रधानमन्त्री डा.बाबुराम भट्टराईले आफूले अर्थमन्त्री (२०६५/६६) र प्रधानमन्त्री (२०६८/६९) हुँदा कृषिक्षेत्रमा गरेका कामहरूको स्मरण गरेका छन्। उनले सामाजिक सञ्जालमार्फत शुक्रबार लेख्दै ‘हामी गफ हैन, गरेर देखाउँछौं’ भन्ने टिप्पणी गर्दै त्यसबेला गरेका केही रणनीतिक महत्वका निर्णयहरू सार्वजनिक गरेका हुन्।

उनका अनुसार आफू प्रधानमन्त्री हुँदा दुवै प्रमुख दल नेपाली कांग्रेस र एमाले विपक्षमा रहेका कारण दुई वर्षसम्म बजेट ल्याउन नदिइएको अवस्था थियो। त्यस्तो चुनौतीपूर्ण परिस्थितिमा पनि कृषिलाई प्राथमिकता दिएको उनको भनाइ छ।

भट्टराईले कृषि मन्त्रालयको बजेट अघिल्लो वर्षभन्दा झण्डै दोब्बर विनियोजन गरेको, पहिलेका सरकारहरूले रोकेको कृषिमलमा अनुदान पुनः व्यवस्थित ढंगले सुरु गरेको र करिब तीन लाख किसान तथा सर्वसाधारणले लिएको साना ऋण मिनाहा गरेको उल्लेख गरेका छन्। उनका अनुसार ३० हजारसम्मको ऋण पूरै र एक लाखसम्मको ऋणमा व्याज मिनाहा गरिँदा गरीब र साना व्यवसायीलाई एकै वर्षमा करिब १० अर्ब बराबरको राहत पुगेको थियो।

त्यस्तै, सिँचाइ क्षेत्रमा क्रान्तिको सुरुवातका लागि दाङ उपत्यका, दरौँदी र इन्द्रावती जलाधार क्षेत्रमा मोडल आयोजना सञ्चालन गरिएको र तराई-मधेसको लागि सुनकोशी-कमला डाइभर्सनमा बजेट विनियोजन गरिएको उनले स्मरण गरे। साथै प्रधानमन्त्रीको कार्यकालमा राष्ट्रिय गौरवका योजनामध्ये चार ठूला सिँचाइ तथा नदी डाइभर्सन आयोजना-सुनकोशी-कमला, सिक्टा, भेरी-बबई र कर्णाली कुलरिया-रानीजमरा अघि बढाएको बताए।

उनले ‘गाउँगाउँमा सहकारी, घरघरमा भकारी’ भन्ने नारासहित तत्कालीन गाउँ विकास समितिहरू (हालका वडाहरू) मा सहकारी स्थापना र सञ्चालनका लागि प्रतिवडामा एक-एक लाख रुपैयाँ अनुदान दिएको जानकारी पनि गराए। शान्ति-सम्झौतादेखि संविधानसम्म उल्लेख भए पनि उपेक्षित ‘वैज्ञानिक भूमिसुधार’ कार्यान्वयन गर्न विगतका आयोगहरूको प्रतिवेदनलाई समेटेर नयाँ प्रतिवेदन तयार पारिएको तर हालसम्म अलपत्र रहेको भट्टराईको भनाइ छ।