मनसुनी प्रभाव बढ्यो, सातै प्रदेशमा बदली र वर्षा

काठमाडौँ- हाल मनसुनको न्यूनचापीय रेखा सरदर स्थानको आसपासमा सक्रिय छ। बंगालको खाडीबाट मनसुनी हावाको प्रभाव बढेसँगै देशभरि वर्षा भइरहेको जल तथा मौसम पूर्वानुमान महाशाखाले जनाएको छ।

शुक्रबार बिहान देशभर आंशिकदेखि साधारणतया बदलीको अवस्था रहेको छ। कोशी र लुम्बिनी प्रदेशका केही स्थानमा भने भारी वर्षा भएको महाशाखाले जनाएको छ।

दिउँसो देशभरि नै बदली रहने र सातै प्रदेशका अधिकांश पहाडी भूभागमा हल्कादेखि मध्यम वर्षा हुने सम्भावना छ। कोशी, गण्डकी र सुदूरपश्चिम प्रदेशका केही भूभागमा भारी वर्षाको सम्भावना पनि छ।

महाशाखाका अनुसार शुक्रबार राति पनि देशैभर आंशिकदेखि साधारणतया बदली रहने पूर्वानुमान गरिएको छ। राति कोशी र सुदूरपश्चिम प्रदेशका एक–दुई स्थानमा भारी वर्षा हुन सक्ने संभावना रहेको छ।