हिमाल प्रेस 
बागलुङ- नौ वर्षदेखि कालोपत्रे नहुँदा मध्य पहाडी लोकमार्गको बागलुङ खण्डमा सवारी साधनले सास्ती व्यहोर्दै आउनु परेको छ।
बिहुँ–घोडाबाधे खण्डको १३ किलोमिटरमध्ये ६ किलोमिटर सडकको दुरावस्थाका कारण सवारी फसेर यात्रुहरूले सास्ती खेप्ने गरेका छन् । हिउँदमा धुलाम्मे र बर्खा लागेपछि हिलाम्मे सडकमा सवारीसाधन वारपार गर्नै समस्या हुने गरेको छ । बागलुङ बजारदेखि घोडाबाधेसम्मको २५ किलोमिटर सडक कालोपत्रेका लागि दुई खण्डमा विभाजन गरेर नौ वर्षअघि ठेक्का लगाइएको थियो ।
जसमध्ये बिहुँ घोडाबाँधेको १३ किमीमध्ये ६ किलोमिटर सडक अझै कालोपत्रे भएको छैन । आठ वर्षमा कालोपत्रे नभएपछि ठेक्का तोडिएको थियो । ठेक्का तोडेर पुनः ठेक्का लगाएको काम एक वर्षमा जम्मा १० प्रतिशत मात्रै प्रगति भएको छ।
चितवनबाट सामग्री ढुवानीका लागि गलकोटतर्फ आएको मिनी ट्रक बिहुँमा फसेर समस्या भएको चालक रमण शर्माले दुःखेसो गरे। ट्रक मात्रै हैन दर्जनौँ कार तथा जिप सडकमा फस्ने गरेका छन्। लोकमार्गको १४० किमीमध्ये अन्यत्र कालोपत्रे भइसकेको छ। बिहुँ खण्डको समस्या समाधान नहुँदा पनि सरोकारवाला निकाय मौन रहेको गुनासो स्थानीयवासीको छ।
नयाँ ठेक्का लागेपछि सडक चौडा पारेकाले यस पटक सडक बढी हिलाम्मे भएको मध्य पहाडी पुष्पलाल लोकमार्ग आयोजना कार्यालय पर्वतका इन्जिनियर कल्पना मिश्रले बताइन्। ‘पुन ठेक्का लगाएको एक वर्ष भयो, २१ करोडको ठेक्कामा जम्मा १० प्रतिशत काम सम्पन्न भएको छ, अहिले पूर्वाधारको काम गरिरहेको र बर्खा लागेकाले सडक हिलाम्मे छ’, मिश्रले भने, ‘निर्माण व्यवसायीलाई बर्खामा सवारीसाधन फस्न सक्ने पहिरो पन्छाउन पर्ने भएकाले डोजरसहित तयारी अवस्थामा राखिएको छ।’
बिहुँ–घोडाबाधे खण्डको अघिल्लो ठेक्का तोडेर २०८१ सालको असार २१ गते दुई वर्षमा बाँकी पूर्वाधार र कालोपत्रे सम्पन्न गर्ने गरी तामाङररिजाल भगवती जेभीसँग रु २१ करोड ४९ लाखमा पुन ठेक्का सम्झौता गरिएको थियो । रासस
