हिमाल प्रेस 
गृहमन्त्रालय
काठमाडौँं– गृह मन्त्रालयले कैलालीको धनगढी कारागारमा भएको कैदीबन्दी झडप प्रकरणलाई गम्भीरतापूर्वक लिई सूक्ष्म रूपमा हेरिरहेको र परिस्थितिलाई सहज बनाउन काम भइरहेको जनाएको छ।
शुक्रबार राति कैदीबन्दीबीच झडप भएर एक जनाको मृत्यु र ४७ जना घाइते भएपछि शनिबार गृहमन्त्री रमेश लेखकले गृहसचिवसहित तीन वटै सुरक्षा निकायका प्रमुखसहित घटनाको समग्र अवस्थाबारे जानकारी लिने क्रममा यस्तो जनाकारी दिइएको हो।
साथै परिस्थिति सहज बनाउने विषयमा बैठकमा छलफल भएको गृहमन्त्री लेखकको सचिवालयले जनाएको छ।
छलफलमा सेती प्रादेशिक अस्पतालमा उपचार गरिरहेका एक जना गम्भीर घाइतेलाई थप उपचारका लागि काठमाडौँ ल्याउने तयारी गरिएको र त्यसका लागि मन्त्रालयले सुर्खेतस्थित नेपाली सेनाको स्काइ ट्रक धनगढी पढाइसकेको मन्त्रालयका प्रवक्ता आनन्द काफ्लेले जानकारी दिए।
‘कारागारको पूर्ण सुरक्षा र थप अप्रिय घटना हुन नदिन नेपाल प्रहरी र सशस्त्र प्रहरी बलले सुरक्षा व्यवस्था कडा पार्नेछन्,’ प्रवक्ता काफ्लेले भने, ‘झडपमा परी घाइते भएका अन्य घाइतेको उपचारको प्रबन्ध मिलाइएको छ।’
बैठकमा कारागारको आन्तरिक सुरक्षालगायतका विषयमा छलफल भएको थियो। शुक्रबार मध्यराति कैदीबन्दीका दुई समूहबीच झडप भएको थियो। झडपपछि शनिबार दिनभर कारागारभित्र सुरक्षाकर्मी प्रवेश गर्न सकेका थिएनन्। कैदीहरूले कारागार आफ्नो नियन्त्रणमा लिएपछि सुरक्षाकर्मीहरूलाई भित्र प्रवेश गर्न सकस परेको थियो। कारागारभित्र शान्ति सुरक्षा कायम गर्न ठूलो संख्यामा सुरक्षाकर्मी परिचालन गरिएको छ।
