नाइमा एक्स्पोमा मोर्बिडेलीका दुई नयाँ साहसिक मोटरसाइकल सार्वजनिक

काठमाडौँ- नेपालको सवारीसाधन क्षेत्रको सबैभन्दा ठूलो प्रदर्शनी नाइमा नेपाल मोबिलिटी प्रदर्शनी २०८२ मा मोर्बिडेली नेपालले आफ्ना दुई नयाँ साहसिक मोटरसाइकलहरू टी ३५२ एक्स र टी २५२ एक्स सार्वजनिक गर्दै नेपाली बजारमा भव्य आगमनको घोषणा गरेको छ।

इटालीको डिजाइनमा आधारित र नवीनतम प्रविधि प्रयोग गरेर निर्माण गरिएका यी मोटरसाइकलहरू नेपालको कठिन भू-भाग र सडक अवस्थालाई लक्षित गरी तयार पारिएको कम्पनीले जानकारी दिएको छ।

कार्यक्रममा मोर्बिडेली नेपालका बिक्री तथा प्रचार-प्रसार प्रमुख नवराज घिमिरेले भने, ‘टी ३५२ एक्स र टी २५२ एक्स मार्फत हामी नेपाली मोटरसाइकल यात्रुहरूलाई अन्तर्राष्ट्रिय स्तरको साहसिक अनुभव दिन चाहन्छौँ। यी मोडेलहरूले नेपाली भूगोलमा रोमाञ्चक र सुरक्षित यात्रा सुनिश्चित गर्नेछन्।’

टी ३५२ एक्स मध्यम आकारको साहसिक मोटरसाइकल हो जसले उकाली-ओराली, अप्ठ्यारा बाटाहरूमा समेत भरपर्दो सन्तुलन र उच्च प्रदर्शन प्रदान गर्छ। यसमा ३४९.२ घन सेन्टीमिटर दुई-सिलिन्डर, आठ पाङ्ग्रा भएको इन्जिन छ जसले ८ हजार ५ सय घुमाइ प्रतिमिनेटमा ४० दशमलव ९ घोडा शक्ति उत्पादन गर्छ। साथै यसमा ६ गतिको गियर प्रणाली, दुई च्यानलको रोकथाम प्रणाली (एबीएस), पन्छिने क्लच, सात इन्चको प्रविधियुक्त पर्दा (डिस्प्ले), तथा पिरेली स्कर्पियन टायर जस्ता सुविधाहरू समावेश छन्।

यसको मूल्य रु. ९ लाख ९७ हजार तोकिएको छ भने प्रदर्शनी अवधिभर छुट सहितको मूल्य रु. ९ लाख २३ हजार कायम गरिएको छ। त्यस्तै, टी २५२ एक्स मुख्यतः प्रारम्भिक र युवा सवारी प्रयोगकर्तालाई लक्षित गरी बनाइएको मोडेल हो। यो २४९ घन सेन्टीमिटरको दुई-सिलिन्डर, पानी चिस्याउने प्रविधियुक्त इन्जिनसहित आएको छ। यसले १२ हजार घुमाइमा ३३ दशमलव ५ घोडा शक्ति उत्पादन गर्छ। यसमा पनि दुई च्यानल रोकथाम प्रणाली, पन्छिने क्लच, अगाडि उल्टो फोर्क र सत्र इन्चको एल्युमिनियम पाङ्ग्रा जस्ता आधुनिक सुविधा छन्।

मोर्बिडेली नेपालले बिक्रीपछि सेवा क्षेत्रमा समेत ध्यान केन्द्रित गर्दै देशभर सेवा केन्द्र विस्तार गर्ने तथा सवारीका सामान सजिलै उपलब्ध गराउने प्रतिबद्धता जनाएको छ। घिमिरेले ग्राहक सन्तुष्टि सुनिश्चित गर्न सेवाको गुणस्तर सुधार गर्दै जाने बताए। प्रदर्शनीमा सहभागी भई स्टल नं. सी ५ मा पुग्ने आगन्तुकहरूले मोर्बिडेली तथा बेनेल्लीका मोटरसाइकलहरूमा विशेष छुट रु. १ लाखसम्मको छुट, निःशुल्क परीक्षण यात्रा, बुकिङमा उपहार र अन्य लाभहरू प्राप्त गर्न सक्नेछन्।