सप्तरी गोलीकाण्ड : गोली प्रहार गर्ने प्रहरीलाई कर्तव्य ज्यान मुद्दा दर्ता गर्न माग

बोदे बर्साइन (सप्तरी)- सप्तरीको राजगढमा प्रहरीको गोली लागेर स्थानीय लालु यादवको मृत्यु भएपछि गाउँपालिकास्तरीय संघर्ष समिति गठन भएको छ।

स्थानीय युवा दीपेन्द्र यादवको संयोजकत्वमा संघर्ष समिति गठन भएको हो। संघर्ष समितिले आज (बुधबार) साँझ प्रमुख जिल्ला अधिकारीलाई चारबुँदे मागसहितको ज्ञापनपत्र बुझाएको छ।

यादवलाई गोली प्रहार गर्ने प्रहरी निरीक्षक वीरेन्द्रकुमार यादवलाई निलम्बन गरी कर्तव्य ज्यान मुद्दा दर्ता गर्न र प्रहरी उपरीक्षकलाई अविलम्ब विभागीय कारबाहीको माग ज्ञापनपत्रमा गरिएको छ।

यादव हत्याको गम्भीर उच्चस्तरीय छानबिन समिति गठन गर्न, यादवलाई सहिद घोषणा गर्दै परिवारलाई क्षतिपूर्ति उपलब्ध गराउन र सीमाक्षेत्रमा प्रहरी आतंक बन्द गरी शान्तिसुरक्षा कायम गर्न माग गरिएको छ।

चौबीस घण्टाभित्र माग पूरा नभए थप आन्दोलनका कार्यक्रम घोषणा गर्ने चेतावनी दिइएको छ। मंगलबार राति पुगेको प्रहरीले चलाएको गोली लागी यादव घाइते भएका थिए। उनको उपचारका क्रममा गजेन्द्रनारायण सिंह अस्पताल राजविराजमा मृत्यु भएको थियो।

नेपालबाट भारततर्फ मदिरा तस्करी भइरहेको भन्दै प्रहरीले मदिरा नियन्त्रणमा लिन जाँदा स्थानीयले ढुंगामुढा गरेपछि गोली चलाउनुपरेको बताएको छ भने मृतकका परिवारले नियन्त्रणमा लिई गोली चलाएको आरोप लगाएको छ।

यसैबीच आजै सप्तरी उद्योग वाणिज्य स‌ंघले पनि लालुप्रसाद यादवको हत्यामा संलग्नलाई कारबाहीको माग गरेको छ।

संघले प्रमुख जिल्ला अधिकारीमार्फत प्रधानमन्त्रीलाई ज्ञापनपत्र पठाउँदै घट्नाको छानबिन गरी दोषीउपर कडा कारबाहीको माग गरेको हो। दोषीहरूलाई कानुनको दायरामा ल्याएर कारबाही नगरिए थप आन्दोलन गर्न बाध्य हुने चेतावनी ज्ञापनपत्रमा छ। रासस