बहुविवाह कानुन बनाउने तयारीको प्रतिनिधिसभामा विरोध

काठमाडौँ- प्रतिनिधिसभाको आजको बैठकको विशेष समयमा सांसद सुशीला श्रेष्ठले कानुनमा बहुविवाहका सम्बन्धमा हुन लागेको नयाँ व्यवस्थाको विषय उठान गर्दै विरोध जनाएएकी छन्।

जनता समाजवादी पार्टीकी सांसद श्रेष्ठले बहुविवाहलाई कानुनी मान्यता दिन लागेको भन्दै सरकारको आलोचना गरेकी छन्। उनले बहुविवाहको छुट पाउने विधेयकलाई महिला समानता र संविधानप्रदत्त अधिकारमाथिको कुठाराघात रहेको बताइन्।

‘पहिलो पत्नीसँग मन मिलेन भने सम्बन्धविच्छेद गरेर अर्को बिहे गरे भइहल्यो, त्यो अधिकार छँदैछ। बहुविवाह गर्न पाउने कानुन संविधानको मर्म भावना र संयुक्त राष्ट्र संघको महासन्धिविरुद्ध ठूलो प्रहार हो’, उनले भनिन्।

श्रेष्ठले प्रस्तावित विधेयकले सम्पूर्ण महिलालाई चुनौती दिने कार्य भएको र महिलाहरू त्यसको डटेर विरोध गर्ने बताइन्।

उनले प्रतिनिधिसभाभित्र गठन हुनुपर्ने महिला समन्वय समिति अझै गठन नहुनु दुःखद् भएको बताउँदै यो समितिको अभावले महिला मुद्दा प्रभावकारी ढंगले उठ्न नसकेको बताइन्।