हिमाल प्रेस 
फुङ्लिङ (ताप्लेजुङ)- ताप्लेजुङ सदरमुकाम फुङ्लिङमा पाथीभरा क्षेत्रसम्बन्धी तस्बिर पुस्तक विमोचन गरिएको छ। पाथीभरा क्षेत्र विकास समितिले आयोजना गरेको सार्वजनिक सुनुवाइ कार्यक्रमका अवसरमा उक्त पुस्तक विमोचन गरिएको हो।
कार्यक्रममा प्रतिनिधिसभा सदस्य योगेशकुमार भट्टराईसहित पाथीभरा क्षेत्र विकास समितिका पदाधिकारीहरूले संयुक्त रूपमा उक्त पुस्तक सार्वजनिक गरेका हुन्। समितिले सो पुस्तकमार्फत पाथीभराको प्राकृतिक सौन्दर्य, धार्मिक आस्था र सांस्कृतिक महत्वलाई दृश्यात्मक रूपमा अभिलेखबद्ध गर्ने प्रयास गरेको जनाएको छ।
पुस्तकमा पाथीभरा क्षेत्रमा विभिन्न समयमा खिचिएका करिब १०० भन्दा बढी तस्बिर समावेश छन्। पुस्तकमा स्थानीय फोटोग्राफर हर्कराज गुरुङ र सन्तोष पुर्कुटीले खिचेका तस्बिरहरू प्रमुख रूपमा राखिएका छन्। ती तस्बिरहरूले पाथीभरादेवी मन्दिरआसपासका हिमाल, हरियाली वनस्पति, धार्मिक मेला र स्थानीय जनजीवनलाई प्रस्ट रूपमा अभिव्यक्त गर्छन्।
पुस्तकमा विशेष गरी ऐतिहासिक र अभिलेखीय महत्त्वका तस्बिरलाई प्राथमिकता दिइएको छ। पाथीभरा प्रसिद्ध धार्मिक तथा पर्यटकीय गन्तव्यमध्ये एक हो। हरेक वर्ष हजारौँ भक्तजन र पर्यटक पाथीभरा दर्शनका लागि पुग्ने गर्छन्। तर त्यस क्षेत्रमा पर्याप्त दृश्य–अभिलेखीय सामग्री सार्वजनिक नभएका कारण समितिले व्यवस्थित पुस्तक प्रकाशन गर्ने पहल गरेको पाथीभरा क्षेत्र विकास समितिले जनाएको छ।
