हिमाल प्रेस 
काठमाडौँ- प्रा पुष्कर बज्राचार्य, मोहनदास मानन्धर र रोजन बज्राचार्यद्वारा लिखित पुस्तक ‘ट्रान्सफर्मिङ नेपालः ब्यालेन्सिङ ग्रोथ विथ इक्विटी’ पुस्तक विमोचन गरिएको छ।
आज (बिहीबार) यहाँ आयोजित एक कार्यक्रममा उपप्रधान तथा सहरी विकासमन्त्री प्रकाशमान सिंह, पूर्वअर्थमन्त्री सुरेन्द्र पाण्डे र काठमाडौँ विश्वविद्यालयका उपकुलपति प्रा अच्युत वाग्लेले संयुक्त रुपमा उक्त पुस्तक विमोचन गरे।
उपप्रधानमन्त्री तथा सहरी विकास मन्त्री सिंहले उक्त पुस्तक नेपालमा समकालीन सार्वजनिक बहस बढाउनका लागि एक महत्त्वपूर्ण ज्ञान स्रोतका रुपमा रहने बताए। पुस्तकले नेपालको थप योजना र नीति निर्माण तथा कार्यान्वयन प्रक्रियालाई मार्गदर्शन गर्ने अपेक्षा रहेको उनको भनाइ थियो।
पूर्वअर्थमन्त्री सुरेन्द्र पाण्डेले नेपाली समाजको विकासबारे विगतमा धेरै राजनैतिक बहस भए पनि आर्थिक बहस भने नभएको बताए।
काठमाडौँ विश्वविद्यालयका उपकुलपति प्रा अच्युत वाग्लेले पुस्तकमा विगतमा प्रकाशित धेरै पुस्तक तथा प्रकाशनको अध्ययन विश्लेषण गरी त्यसको सन्दर्भसमेत उल्लेख गरिएको बताए।
त्यस अवसरमा अध्यक्ष तथा पुस्तकका लेखक प्रा पुष्कर बज्राचार्यले पुस्तक देशलाई समृद्ध नेपालमा रूपान्तरणको बाटो देखाउन लेखिएको र विश्लेषणका आधारमा देशले अब लिन पर्ने कदमहरु सिफारिस गरेको बताए।
लेखक मोहन दास मानन्धरले नेपालमा विकास कार्यक्रम र परियोजनाहरूको आधार तयार गर्न पुस्तक एक बहुमूल्य स्रोत हुने बताए। लेखक रोजन बज्राचार्यले शिक्षक, विद्यार्थी, विकास अभ्यासकर्ता र आम पाठकहरू र नेपालको विकासमा रुचि राख्ने सबैलाई पुस्तक महत्त्वपूर्ण हुने बताए।
पुस्तकमा नेपालको सामाजिक आर्थिक स्थितिको विश्लेषण, समृद्धि र सामाजिक कल्याणको रूपरेखा प्रस्तुत गर्दै मुलुकमा भएका नीतिगत पहलहरूको विश्लेषणात्मक अनुसन्धान गरिएको छ। पुस्तकमा मुलुक रूपान्तरणका लागि महत्त्वपूर्ण सुझाव सिफारिस समेत गरेको छ।
पुस्तकले मूलतः अर्थतन्त्रका सबै आयामहरू र खण्डहरूलाई समेट्दै स्रोतहरूको उचित प्रयोग गर्ने नवीन दृष्टिकोण सहितको निकास प्रदान गरेको जनाइएको छ।
