पूर्वराष्ट्रपति भण्डारी एमालेको राजनीतिमा फर्किन खोज्नु सकारात्मक कुरा हो : खनाल

काठमाडौँ– नेकपा एकीकृत समाजवादीका सम्मानित नेता झलनाथ खनालले वामपन्थी एकताका लागि पूर्वराष्ट्रपति विद्या भण्डारी एमालेको राजनीतिमा फर्कन खोजेको भए सकारात्मक कुरा भएको बताएका छन्।

चीन भ्रमण सकेर स्वदेश फर्किएपछि शनिबार आफ्नै निवास डल्लुमा सञ्चारकर्मीसँग कुरा गर्दै खनालले नेपालमा सबभन्दा ठूलो वामपन्थी समूह नेकपा एमाले नै भएकाले वामपन्थी एकताका लागि पूर्वराष्ट्रपति भण्डारी एमालेको राजनीतिमा फर्कन खोजेको भए सकारात्मक कुरा भएको बताएका हुन्।

उनले एमालेको एउटा समूहले अरु सबैलाई एकताबद्ध गर्न नचाहेको हुनाले वामपन्थी आन्दोलन विभाजित अवस्थामा रहेको उनले बताए। खनालले एमालेले वामपन्थी एकता गरौँ भनेर चाहने हो भने ठूलो मात्राको झैं वामपन्थी एकता हुन सक्ने सम्भावना रहेको जिकिर गरे।

खनालले कम्युनिष्टलाई एकतावद्ध गर्न वामदेव गौतम आफ्नो पार्टीमा आउन लागेको भए स्वागत गर्न तयार रहेको जिकिर गरे। त्यस्तै उनले पार्टी अध्यक्ष माधव नेपालमाथि परेको मुद्दा नेपालकै इतिहासमा नै नयाँ कुरा भएकाले तीन करोड नेपालीको सरोकारको विषय भएको उल्लेख गरे।

यसमा विभिन्न रुपमा हुने टिकाटिप्पणीलाई स्वभाविक रुपमा लिनुपर्ने भन्दै खनालले अदालतले गर्ने निर्णयलाई सवैले स्वीकार गर्नुपर्ने बताए। पूर्वप्रधानमन्त्रीसमेत रहेका खनालले अहिले ठूला दुई दल मिलेर बनेको सरकार सबैभन्दा असक्षम देखिएकाले सिंगो देश सन्तुष्ट नरहेको बताए।

उनले रवि लामिछाने निर्दोष रहेको भन्न नसकिए पनि लामिछानेमाथि गल्ती भयो भन्ने नाममा राज्यले ज्यादती गरिरहेको टिप्पणी गरे।

खनाल पाँचदिने चीन भ्रमण सकेर शुक्रबारराति स्वदेश फफर्किएका हुन्। भ्रमणका क्रममा विभिन्न कार्यक्रम र चिनियाँ कम्युनिष्ट पार्टीका शीर्ष नेतृत्वहरूसँग भेटघाट भएको उनले बताए।