हिमाल प्रेस 
काठमाडौँ– आतंकवादीहरूले पाकिस्तानको अशान्त दक्षिणपश्चिमी बलुचिस्तान प्रान्त हुँदै यात्रा गरिरहेका कम्तीमा नौ जना बस यात्रुलाई अपहरण गरी गोली हानेर हत्या गरेको सरकारी अधिकारीहरूले बताएका छन्। अफगानिस्तान र इरानको सिमानामा रहेको गरिब तर खनिज समृद्ध बलुचिस्तानमा बढ्दो जातीय र पृथकतावादी हिंसासँग सुरक्षा बलहरू लडिरहेका छन्।
बिहीबार राति मुख्य राजमार्गमा आतंकवादीहरूले दुई बसमा चढेर यात्रुहरूको पहिचान कार्डहरू जाँच गरेपछि नौ जनालाई बन्दुक देखाएर बसबाट जबरजस्ती ओरालेका थिए।
‘आतंककारीहरूले दुईवटा यात्रु बसलाई राजमार्गमा रोक्न बाध्य पारे र नौ जना यात्रुलाई बाहिर निकाले। तिनीहरूले उनीहरूलाई नजिकैको क्षेत्रमा लगे र सबैलाई मारे,’ स्थानीय सरकारी अधिकारी नावीद आलमले भने।
आक्रमणकारीहरूले विशेष गरी देशको सबैभन्दा बढी जनसंख्या भएको र समृद्ध प्रान्त तथा सेनाका लागि एउटा प्रमुख भर्ती आधार पञ्जाबका मानिसहरूलाई लक्षित गरेका थिए।
‘सुरक्षा बलहरूले फेला पारेका मृत शरीरहरू सबै पञ्जाबका विभिन्न क्षेत्रका छन्,’ अर्का वरिष्ठ सरकारी अधिकारी सादत हुसैनले भने। राज्यसँग लडिरहेको पृथकतावादी समूह बलुचिस्तान लिबरेसन फ्रन्ट (बीएलए) ले पछि आक्रमणको जिम्मेवारी लिएको थियो।
प्रान्त बाहिरबाट विदेशी चासो, सुरक्षा बल र पाकिस्तानीहरूलाई लक्षित गर्ने सबैभन्दा ठूलो खतराका रूपमा बीएलए देखा परेको छ। विद्रोहविरुद्धको सेनाको कडा आतंकवादविरोधी प्रतिक्रियामा व्यापक रूपमा जबरजस्ती बेपत्ता र गैरन्यायिक हत्याहरू समावेश रहेको बलुच पृथकतावादी र अधिकार समूहहरूले बताएका छन्।
बलुचिस्तान हाइड्रोकार्बन र खनिजमा धनी छ, तर यसको एक करोड ५० लाख बासिन्दामध्ये ७० प्रतिशत गरिबीको रेखामुनि बस्छन्। मार्चमा आतंकवादी समूहले चार सय ५० भन्दा बढी यात्रु बोकेको रेलमा घातक आक्रमण गरेको थियो।
इस्लामावादस्थित विश्लेषण समूह सेन्टर फर रिसर्च एन्ड सेक्युरिटी स्टडिजका अनुसार गत वर्ष पाकिस्तानका लागि एक दशकमा सबैभन्दा घातक थियो। उक्त वर्ष एक हजार छ सयभन्दा बढी मानिस मारिएका थिए।-रासस/एएफपी
